Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 391 Hüküm no: 452 Orijinal metin no: [72b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âsiye Hatun’un kefaletten doğan borcunu Zeyneb Hatun bt. Abdullah’ın vârislerine ödemesi Bundan akdem vefât eden Zeyneb Hâtun [bt.] Abdullah’ın verâseti zevce-i metrûkü olup sâbıkan Mısr-ı Kahire kadısı olan a‘lemü’l-ulemâ’i’l-izâm efdalü’l-fuzalâ’i’l-fihâm es-Seyyid Ali Efendi ile evlâd-ı sıgārı Mehmed Çelebi ve Hatice ve Fâtıma’ya münhasıra olduğu şer‘an zâhir ve müte‘ayyin oldukdan sonra sıgār mezkûrûnun babaları ve velîleri olan mûmâ-ileyh es-Seyyid Ali Efendi tarafından husûs-ı âti’l-beyâna vekîl olup Mehmed Efendi b. Süleyman ve es-Seyyid Abdullah Efendi b. Mehmed şehâdetleriyle şer‘an vekâleti sâbite olan Şâhin Beşe b. Abdullah meclis-i şer‘-i şerîf-i enverde Âsiye nâm hâtun mahzarında bi’l-vekâle üzerine da‘vâ ve takrîr-i kelâm edip müteveffât-ı mezkûrenin gāib ani’l-meclis Memiş Ağa b. Mahmud zimmetinde işbu deyn temessükü nâtık olduğu üzre cihet-i karz-ı şer‘îden beş yüz esedî guruş ile yedinden müşterâ ve makbûz bir nâfe kürk bahâsından dahi elli esedî ki cem‘an beş yüz elli esedî guruş hakkı olup meblağ-ı mezbûr kefîl-i mezkûre Âsiye Hâtun’a edâ ve kabûlü hâviye kefâlet-i sahîha-i şer‘iyye ile kefîl oldukdan sonra kable’l-ahz mezkûr Zeyneb Hâtun vefât edip meblağ-ı mezbûr irsen veresesine isâbet eyledikden sonra mezkûr Memiş Ağa meblağ-ı mezbûrdan yüz elli guruşu edâ ve teslîm edip dört yüz esedî guruşu bâkī kalmağın hâlâ suâl olunup meblağ-ı bâkī-i mezbûr dört yüz esedî guruşun bi hükmi’l-kefâle mezkûre Âsiye Hâtun’dan alıverilmek matlûbumdur dedikde gıbbe’s-suâl mezbûre Âsiye cevâbında fi’l-hakīka meblağ-ı mezbûra emr ve kabûlü hâviye kefâlet-i sahîha-i şer‘iyye ile kefîl olup bi hükmi’l-kefâle meblağ-ı bâkī-i mezbûr dört yüz guruşu zimmetinde edâ lâzım geldiğini tav‘an ikrâr ve i‘tirâf etmeğin alâ mûceb-i i‘tirâfihâ meblağ-ı mezbûr dört yüz guruşu müvekkil-i mûmâ-ileyh için vekîl-i mezbûra edâ ve teslîme mezbûre Âsiye’ye tenbîh olunup mâ [va]ka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mehmed b. İdris, Ali b. Bâli.