Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 391 Hüküm no: 453 Orijinal metin no: [73a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Hüseyin Ağa b. Mustafa b. Hüseyin’in vârislerinin Hacı Yusuf Bey b. Ömer’e olan borcu ödemesi Mahmiye-i İstanbul’da Saray-ı atîk-i sultânî teberdârlarından bâ‘isü hâze’l-kitâb el-Hâc Yusuf Bey b. Ömer nâm kimesne meclis-i şer‘-i şerîf-i enverde bin doksan altı senesinde küçük sakabaşı iken bundan akdem tarîk-i hacc-ı şerîfde Bedr-i Huneyn’de vefât eden el-Hâc Hüseyin Ağa b. Mustafa b. Hüseyin’in li üm kız karındaşları ve vâriseleri olmağla terekesine vaz‘-ı yed eden Âsiye ve Fâtıma taraflarından husû[s]-ı âti’l-beyâna vekîl-i müsecceli olan Ali Efendi b. Yusuf mahzarında üzerine da‘vâ ve takrîr-i kelâm edip müteveffâ-yı mezbûra bundan akdem hayâtında yirmi dört kıt‘a yaldız altını ikrâz ve teslîm ol dahi iktirâz ve tesellüm ve kabz ve tesellüm ve mesârifa sarfla istihlâk edip kable’l-edâ vefât etmekle suâl olunup meblağ-ı mezbûru müvekkiletân-ı mezbûretân terekesinden edâ etmek üzre vekîl-i merkūma tenbîh olunmak matlûbumdur dedikde gıbbe’s-suâl vekîl-i mezbûr cevâbında müvekkilelerinin tereke-i müteveffâ-yı merkūma vaz‘-ı yedlerini ikrâr lâkin deyn-i mezbûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i müslimînden olup saray-ı mezkûr teberdârlarından el-Hâc Mustafa b. Yusuf ve el-Hâc Ali b. Mustafa nâm kimesneler li ecli’ş-şehâde meclis-i şer‘a hâzırân olup işhâd olunduklarında fi’l-hakīka işbu müdde‘î-i merkūm el-hâ[c] Yusuf müteveffâ-yı mesfûr el-Hâc Hüseyin Ağa b. Mustafa b. Hüseyin’e bundan akdem hayâtında yirmi dört yaldız altını bizim huzûrumuzda ikrâz ve teslîm ol dahi istikrâz ve kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye eyledikler[inde] ba‘de’t-ta‘dîl olundukdan sonra mûcebiyle meblağ-ı mezbûr yirmi dört yaldız altını müvekkiletân-ı merkūmetân müteveffâ-yı mezbûrun terekesinden müdde‘î-i mezbûra edâ ve teslîm etmek üzre vekîl-i mersûma tenbîh olunmağın mâ [va]ka‘a bi’t-taleb ketb olundu. Fi’l-yevmi’l-âşir min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi Ser-muhzırân, el-Hâc Ali b. İbrahim, Diğer İbrahim [b.] Ali, el-Hâc Mehmed b. Ali.