İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 183 Hüküm no: 65 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnafın odun ve kömür ihtiyacını karşılamak için yeni çenber ve çekeleveler inşası emri Bâ-sahh-ı âlî. İstanbul kādısı fazîletlü efendi. Bahr-ı siyah tarafından Dersa‘âdet’e sinîn-i sâbıkāda olduğu vechile kesret ve vefret üzere hatab ve kömür vürûd etmediğinden bu keyfiyet ibâdullâhın zarûret ve muzâyakalarını müeddî olup bir müddetden beri mikdâr-ı kifâye hatab ve kömür gelmemesi dahi o makūle Dersa‘âdet’e hatab ve kömür nakliyle me’lûf olan çenber ve çekelerine kıllet târî olarak iskelelerde külliyetli odun mevcûd ise de celbi’çün vaktiyle iskelelere müstevfâ çenber ve çekelevelere amed-şud eylemediğinden neş’et eylediği istihbâr ve tahkīk olunup mukaddemlerde hatab ve kömür çenber ve çekelevelerine kıllet geldikde zî-kudret olan esnâf taraflarından çenber ve çekeleveler inşâsıyla odun ve kömür nakli maddesine ârız olan muzâyaka def‘ olunmuş ve o makūle kayık ashâbı dahi kesb-i menfa‘at etmiş olduğundan ibâdullâhın tevsî‘-i dâire-i ma‘âşları niyyet-i hâlisesiyle bu def‘a Kapan-ı dakīk tüccârı ve keresteci esnâfına ikişer ve boyacı ve Odunkapılıya ve dülbendci ve francalacı esnâflarına birer kıt‘a çenber ve Mısırçaşısı ve Balkapanı tüccârına ikişer ve Yağkapanı ve ekmekçilere ve hamamcılara birer kıt‘a çekeleve ve basmacılar esnâfına bir kıt‘a sivrikıç ve Ermeni ve Rum milletlerinden dahi birer kıt‘a çenber ki cem‘an on sekiz kıt‘a çenber ve çekeleve ve sivrikıç kayık inşâsı irâde olunmakla imdi tüccâr ve esnâf-ı merkūme kethüdâları ile sâir lâzımü’l-huzûr olanları celb-birle sâlifü’z-zikr çenberlerin bin iki yüz ve mezkûr çekelevelerin dahi altı yüzden sekiz yüz çeki hamûleyi mütehammil olmak ve nihâyet tekmîlleri târih-i buyruldudan i‘tibâren dört mâha kalmamak üzere ucâleten inşâsına mübâderet ve müddet-i kalîle zarfında tekmîl eylemelerini cümlesine tenbîh ve tekîde dikkat ve bu madde özr ve illet edecek mevâddan olmayıp müstelzim-i temettu‘ ve menfa‘at olacak maslahat-ı hayriyyeden olmağın eğer tereddüd ve muhâlefet dâ‘iyesinde olanları olur ise cebren zâbitleri ma‘rifetiyle akçeleri tahsîl ve cânib-i Devlet-i aliyyeden inşâ ettirileceği tefhîm ve o makūlelerin isim ve şöhretleri Bâb-ı âlî’ye inhâ ve takdîme mübâderet eyleyesin deyü. Fî 25 Recebi’l-ferd sene 1240.