İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 183 Hüküm no: 64 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların gündüz açık renkli kıyafetlerle çarşı pazarda gezmemeleri ve geceleri de mazaretsiz sokağa çıkmalarının yasak olduğu Bâ-sahh-ı âlî. İstanbul kādısı fazîletlü efendi. Tâife-i nisânın geşt ü güzâr men‘i. Nüzzârının edebiyle geşt ü güzârı. Cemî‘ zamânlarda nisâ tâifesini bî-vakit sokaklarda gezmesi gayr-ı mücâz iken el-hâletü hâzihî Ramazan-ı şerîf münâsebetiyle geceleri nisvân tâifesi sokaklarda gezmeğe ibtidâr ve gündüzleri dahi bed-renk ferâce ve İslâma yakışmayan bozuk yaşmak ve kıyâfet ile çarşı ve pazarda bî-muhâbâ geşt ü güzâra ictisâr etmekde oldukları meşhûd olup bu makūle mugāyir-i nâmûs ve ismet tâife-i nisânın gecelerde bilâ-mûceb sokaklarda ve gündüzleri dahi uygunsuz ve bed-renk ferâce ve kıyâfet ile çarşı ve pazarda gezmelerinin men‘i zevclerinin üzerlerine lâzım iken takayyüd olunmaması şer‘-i şerîfe dahi muvâfık olmayacağından bu maddenin men‘i lâzım gelmekle fîmâ ba‘d nisâ tâifesinin bilâ-mûceb ahşamdan sonra sokağa çıkması men‘-i küllî ile memnû‘ olduğunun ve gündüzleri dahi açık ve bed-renk ferâce ve ehl-i İslâma yakışmaya[n] kıyâfet ile çarşı pazarda gezmemelerini her bir mahallede olan ahâlîye tefhîm eylemelerini eimme-i mahallâtı celb ile muhkem tenbîh ve bundan böyle geceleri sokaklarda nisâ tâifesi görülür ise ve gündüzleri dahi o makūle bed-renk ferâce ve uygunsuz kıyâfet ile çarşı pazarda tâife-i nisâ müşâhede olunur ise zâbitân tarafından kime müte‘allık ve kimin zevcesi olduğu taharrî olunarak derhâl tedîb olunacağını etrâfıyla gûş-ı hûşlarına ilkā ve tefhîme dikkat eyleyesin deyü. Fî 11 N sene [1]240.