İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 222 Hüküm no: 91 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eminönü’nde bulunan altı adet sebzeci dükkânının yıkım emri Bâ-sahh-ı âlî. İstanbul kādısı fazîletlü efendi ve Hâssa mi‘mâr ağa. Eminönü’nde altı bâb sebzeci dükkânları hedmi. Bi-tevfīkillâhî te‘âlâ havene-i yeniçeriyânın nâm ü nişanları sahîfe-i rûzgârdan mahv ve ilgā-birle hilâf-ı şer‘ ve nizâm her bir mevâddın taht-ı intizâm ve râbıtasına dikkat ve i‘tinâ olunmakda olup el-hâletü hâzihî Eminönü nâm mahalde vâki‘ gedikleri merfû‘ ve sebze bey‘inden memnû‘ olan altı bâb dükkânda mütemekkin Mehmed Sa‘îd ve Seyyid Ahmed Yazıcı ve Ali Reis oğlu Seyyid Hasan ve İmâmoğlu Seyyid İbrahim ve diğer Seyyid İbrahim ve Seyyid Mustafa Yazıcı nâm kimesneler dekâkîn-i mezkûrede sebze bey‘i’çün Mihrişah Sultan tâbe serâhâ hazretlerinin vakfına tashîh olunmuş iken cânib-i vakfa i‘tâ edecekleri icâresi sebzeci esnâfı ta‘ahhüd ederek gedikleri bâ-hatt-ı hümâyûn ilgā olunmuş ve ba‘de’l-yevm hâric ve dâhilinde sebze bey‘ olunmamak üzere mukaddemlerde dört def‘a bâ-fermân-ı âlî sicill-i mahfûza kayd ettirilmiş ve zikrolunan dükkânların hedmi lâzım gelmiş olmağla imdi dekâkîn-i mezkûrenin ma‘rifetiniz ile hedm ve ilgāsı husûsuna mübâderet eyleyesin deyü buyruldu. Fî 27 Za sene 1241.