İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 227 Hüküm no: 98 Orijinal metin no: [37b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sonradan berber dükkânı yapılanlarla birlikte tüm kahve dükkânlarının kapatılması emri Asâkir-i Mansûre-i Muhammedi’ye Seraskeri vezîr-i mükerrem sa‘âdetlü mekremetlü Hüseyin Paşa hazretleri ve İstanbul kādısı fazîletlü efendi İstanbul ve hâricinde vâki‘ kahve ve dükkânlarında dâimâ işsiz ve güçsüz bir takım kimesneler cem‘ olarak evkāt-ı salâtda cevâmi‘ ve mesâcide gitmemiş ve menhiyyât-ı şer‘iyyeden olan lu‘b [ve] lehv ve gıybet ve mesâvî ile meşgūl olmak misilli menâhîyi irtikâb etmekde ve bunu i‘tibâr ile hem ibâdet ve tâ‘ât ve hem kisb ü ticâretden kalıp vakitlerini bî-hûde geçirmekde olduklarına mebnî bu makūle şer‘-i şerîfe ve usûl-i mülkiyyeye mugāyir hâlâtdan def‘ ve ref‘i lâzımeden olmağla imdi kadîm olan berber dükkânları ibkā olunup aslından berber dükkânı olmayan mecmû‘ kahve dükkânları fîmâ ba‘d berber dükkânı olmamak ve âhar dükkân olarak kullanılmamak ve oralarda birikip terk-i ibâdet ve irtikâb-ı menhiyyât edenler dahi hâllerine göre kisb ü kâr ve san‘at ve ticâret ile meşgūl olup battâl kalmamak üzere İstanbul’un dâhil-i sûr ve etrâfında ve hâric-i sûrunda Ayvansaray’dan Yedikule’ye varınca gerek mahallât aralarında ve gerek çarşı ve hânlarda ne mikdâr kahve var ise hiç birisi kalmayarak cümlesinin fakat ocaklarını hedm edip fîmâ ba‘d kahve işlememek ve berber dükkânı etmeyip âhar dükkân olarak kullanılmak üzere ashâbına muhkem tenbîh ve tekîd eyleyesin deyü. Fî 15 Z sene [1]241.