İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 226 Hüküm no: 97 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 1242 senesi İstanbul avarız bedellerinin tahsili emri Bâ-sahh-ı âlî. İstanbul kādısı fazîletlü efendi. Avârız fermânı. Akzâ kuzâti’l-Müslimîn evlâ vülâti’l-muvahhidîn ma‘deni’l-fazli ve’l-yakīn râfi‘u a‘lâmi’ş-şerî‘ati ve’d-dîn vâris-i ulûmi’l-enbiyâi ve’l-mürselîn el-muhtassu bi-mezîd-i inâyeti’l-Meliki’l-Mu‘în mevlânâ İstanbul kādısı zîdet fezâiluhû tevkī‘-i refî‘-i hümâyûn vâsıl olıcak ma‘lûm ola ki Hazîne-i âmirem defterleri mûcebince Tersâne-i âmirem ocaklığından İstanbul kazâsının iki bin altı yüz doksan beş buçuk ve bir sülüs avârız hânesi olup bin iki yüz kırk iki senesine mahsûb olmak üzere cem‘ ve tahsîl lâzım gelmeğin ( ) deruhde olunup yedine mühürlü ve nişanlu Mevkūfât defteri sûreti verilmekle imdi mûcebince cem‘ ve tahsîl ettirilmek fermânım olmuşdur. Buyurdum ki hükm-i şerîfimle mübâşir vardıkda bu bâbda sâdır olan emrim üzere amel edip dahi sene-i mezbûra mahsûben kazâ-i mezbûrun ol mikdâr avârız hânesinin beher hânesinden dörder yüz yirmi dokuzar akçe kürekci bedellerin irsâl olunan mühürlü ve nişanlı Mevkūfât defteri sûreti mûcebince vakt ü zamânıyla yerli yerinden cem‘ ve tahsîl ve dâhil-i Tersâne-i âmirem ettirdip hilâf-ı emr ve defter kimesneye ta‘allül ve inâd ve muhâlefet ettirmeyesiz ve bundan mâ‘adâ mübâşir-i merkūmun cihet-i ma‘âşiçin her bir avârız hânesinden otuzar akçe ve on beşer akçe harc-ı Tersâne-i âmirem için aldırılıp ve avârız için alınan akçenin her yüz on akçesinden bir esedî guruş tahsîl ettirilip ve hîn-i tahsîlde avârız için alınan akçeyi Hazîne-i âmireme alındığı vech üzere aldırdıp bundan ziyâde ve noksan alınmaya ve aldırmayasız. Kesr-i defterden ve nakz-ı hâneden ve fermân-ı âlîşânımdan ziyâde mutâlebesiyle zulüm ve te‘addî olunmakdan gāyetü’l-gâye ihtirâz ve ictinâb eyleyesiz. Şöyle bilesiz alâmet-i şerîfe i‘timâd kılasın. Fî 19 Z sene 1241.