İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 228 Hüküm no: 100 Orijinal metin no: [37b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beş vakit namazın cemaatle eda edilmesi ve Cuma namazının sünnetlerinin terk edilmemesi emri Bâ-sahh. İstanbul kādısı fazîletlü efendi. Cümle ehl-i îmâna ma‘lûm olduğu üzere dîn-i İslâmın esâs ve mebnâsı Kitâbullâh’ın ahkâm-ı celîlesine ve sünnet-i seniyye-i hazret-i peygamberîye kemâl-i mutâba‘atla şer‘-i şerîfin her bir emir ve nehyine inkıyâd ve mutâva‘atdan ibâret iken bir vakitden beri ekser-i nâsı gaflet ve cehâlet istîlâ ederek ba‘zıları bir takım erbâb-ı rafz ve ilhâdın idlâl ve igvâ <> ve birazı dahi kahvehâne köşelerinde iştigāl-i mâlâ-ya‘nî kelime-i şehâdetden sonra akdem-i ferâiz-i dîniyeden olan evkāt-ı hamseyi cemâ‘atle edâ sünnet-i müekkede-i hazret-i Resûl-i kibriyâ idiği bunca ehâdis-i şerîfe ile müsbet iken ma‘âzallâhu te‘âlâ ba‘zıları hiç namaz kılmayıp ba‘zı kılanlar dahi cemâ‘ate müdâvemetden ibâ’ ve kendi başlarına vakitli vakitsiz edâ eylemekde oldukları bi’l-bâr? ma‘lûm ve meşhûd olduğuna binâen bi’l-cümle ümmet-i Muhammed’i dâreynde müntic-i hizy ve hüsrân olacak o makūle ef‘âl-i seyyieden tahlîs ile mücerred salâh-ı hâle da‘vet zımnında erbâb-ı rafz ve ilhâd olan gürûh-ı melâhideden bir kaçının ber-muktezâ-yı şerî‘at-ı mutahhar cezâları tertîb ve ekseri dahi nefy ve tedîb olunarak Âsitâne-i devlet-âşiyâne levs-i vücûdlarından tasfiye ve tathîr olunmuş ve o makūle dârü’l-kenede olan erâzil kahvehâneleri dahi bi’t-teftîh sedd ü bend kılınmış ise de yine ekser-i nâs me’lûf oldukları tehâvün ve betâetleri sebebiyle lâyıkıyla salât ve cemâ‘ati kayırmamakda ve bir dahi Cum‘a namazına gidenler fakat farz olan iki rek‘at Cum‘a namazını edâ ettikleri gibi cevâmi‘-i şerîfeden savuşmakda olup hâlbuki gerek cemâ‘ate müdâvemet ve gerek zuhr ve Cum‘a namazlarından evvel olan dört rek‘at salât fi‘l-i Resûllullâh ile sâbit olmuş olduğu misilli Cum‘a’nın iki rek‘at farzından sonra tekrar dört rek‘at dahi ikāme-i salât eylemek kezâlik rütbe-i vücûbda sünnet-i müekkede olduğuna binâen bilâ-özr-i şer‘î terk etmek ayn-ı isâet ve ma‘âzallâhu te‘âlâ şefâ‘atdan mahrûmiyeti müstelzim bir keyfiyet olmakdan nâşî imdi ba‘de’l-yevm cümle ümmet-i Muhammed mesâğ-ı şer‘î olmayan melâhî ve menâhîden teberrî ve ictinâb ile beş vakit namazı cevâmi‘ ve mesâcidde ve dâire ashâbı ve dâirelerinde cemâ‘atle edâya şitâb ve müsâra‘at ederek ve eyyâm-ı Cum‘a’da dahi asl-ı salât-ı Cum‘a’yı ba‘de’l-edâ ikāmesi derece-i vücûbda olan dört rek‘at sünnet-i müekkedeyi edâ etmeksizin cevâmi‘-i şerîfeden taşra hurûc etmeyerek ol vechile îfâ-yı lâzıme-i diyânet ve ihyâ-yı sünnet-i seniyyeye ikdâm ve gayret eylemelerini ve bundan sonra dahi dinlemeyip de hilâfını irtikâb edenler dünyâ ve âhiretde mesûl ve mu‘âteb olacaklarını bi’l-cümle mümin ve muvahhid olanların gûş-ı hûşlarına gereği gibi ilkā ve tefhîm etmeleri keyfiyetini bi’l-cümle mahallât imâmlarına tenbîh ve tekîde mübâderet ve siz dahi şu emr-i vâcibü’l-i‘tinâ ve dâimâ <> müstemirren ikdâm ve sarf-ı rü’yet eyleyesin deyü. Fî 8 M sene [1]242.