İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 229 Hüküm no: 101 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni oluşturulan Cebehâne’nin her yüz neferi bir saf itibarıyla her safa bir yüzbaşı ve birer imam tayin edilmesi emri Bâ-sahh. İstanbul kādısı fazîletlü efendi. Cümleye ma‘lûm olduğu vechile Devlet-i aliyye ebediyyü’d-devâmın ez-kadîm lüzûmlu ocaklarından olan Cebehâne ocağı dahi mürûr-ı zamân ile nizâm-ı aslîsinden çıkmış ve içlerinde olan eşkıyânın dahi sâbıkā ve [lâ]hikan dîn ve Devlet-i aliyyeye ihânetleri vukū‘una mebnî ittifâk-ı âmme ile külliyen nâm ve nişanları ref‘ ve imhâ olunan yeniçeri tâifesinin zuhûr eden fesâd ve fitnelerinde ittifâk ve ittihâdları tahakkuk etmiş olduğuna binâen salâh-ı hâl-i âlem için ocağ-ı mezkûrun dahi evvelki usûl ve kavâ‘idi külliyen ref‘ ve ilgā ve mukaddemden içinde bulunan ketebe ve kethüdâ <> ve çorbacı ve zâbitân sâireden hiç birisi ba‘d ez-în ocağ-ı mezkûrda istihdâm olunmamak üzere cümlesinin def‘ ve ihrâclarıyla bu def‘a bi-tevfīkillâhî te‘âlâ müceddeden ihyâ ile neferât ve zâbitânın tertîb ve tahrîrine şürû‘ ve mübâşeret olunmuş olan Cebehâne asâkirinin usûl-i i‘mâl ve istihdâmları ve ma‘âş ve ta‘yînât ve ta‘lîm ve ta‘allümlerine ve nizâmât-ı sâirelerine dâir ittifâk-ı ârâ ile karâr-gîr olup bâlâsı hatt-ı hümâyûn-ı kerâmet-makrûn-ı hazret-i şehinşâhî tevşi‘ buyrulmuş olan kānûnnâme-i hümâyûnda bi-mennihî te‘âlâ tertîb ve tahrîr olunmakda olan ma‘a zâbitân bin elli dört nefer Cebehâne neferâtının beher yüz neferine bir saf i‘tibârıyla beher safa birer yüzbaşı nasb olunması ve bunlara külle yevm ale’s-sabah birer nevbet Kur’ân-ı azîmü’ş-şân ve mesâil dîniyeyi ta‘lîm ve evkāt-ı mefrûzayı cemâ‘atle edâ eylemelerine ihtimâm ve dikkat etmek üzere beher safa ma‘rifetiniz ile bi’l-imtihân ve bi’l-intihâb birer muvazzaf imâm nasb ve ta‘yîn kılınması ve bunların her birine otuzar guruş mâhiye ve ol mikdâr kisve-bahâ tertîbiyle cem‘an mâh be-mâh altmış guruş verilmesi maddeleri münderic ve musarrah olmağla imdi Cebehâne nâzırı efendi ile bi’l-muhâbere beher safa külle yevm edâ-yı salât ettirmek ve birer nevbet Kur’ân-ı azîmü’ş-şân ve ilmihâl-i Kur’ân kırâetiyle ta‘lîm-i dîn <> ve diyânet eylemek ve’l-hâsıl bunlar hem ikāmet ve hem mekteb hocalığı etmek [üzere] erbâb-ı istihkākdan bi’l-imtihân ve bi’l-intihâb âlimü bi’l-mesâil ve kāri ve mücevvid ve on nefer imâm efendiler tedârik-birle nasb ve ta‘yîn ederek bi-mennihî te‘âlâ cümlesinin ardı alındıkdan sonra iktizâsı icrâ olunmak üzere defterinin takdîmi husûsuna mübâderet eyleyesin deyü. Fî 12 M sene [12]42.