İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 238 Hüküm no: 106 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çalıştıkları işlere göre fiyat tespiti yapılan amele narh defteri Bâ-sahh-ı âlî. Amele yevmiyyesi narhı defteri. İstanbul kādısı fazîletlü efendi ve Şehremîni efendi ve Hâssa mi‘mârı ağa. El-hâletü hâzihî ibâdullâhın inşâsına muhtâc oldukları ebniye ile mîrî binâlar kesret üzere olmak cihetiyle hem ibâdullâhı zarardan ve hem cânib-i mîrîyi hasârdan vikāyeten iktizâ edenler ma‘rifetleriyle tertîb olunmuş olan işbu defterde muharrer amele yevmiyyesi fîmâ ba‘d düstûrü’l-amel tutulup bundan ziyâde alıp vermeğe cesâret edenler ma‘rifetiniz ile bi’t-tahkīk men‘ ve tedîb olunmak üzere keyfiyeti tarafınıza ifâde ve i‘lâma mübâderet ve fîmâ ba‘d yevmiyye-i maktû‘a-i mezkûreden ziyâdeye amele işledilmemesine dikkat ve nezâret eyleyesin deyü. Fî 6 S. sene 1242. Âsitâne-i sa‘âdet ve civârında inşâ olunmakda olan ebniye-i mîrî ve ibâdullâh binâlarında istihdâm olunacak sunûf-ı amele binâ kollarına bundan akdem karâr verilen fiyat-ı mu‘tedile üzere istihdâm olunup ziyâde fiyat mutâlebesiyle ibâdullâhı zarardan ve hem cânib-i mîrî hasârdan vikāye olunması vâcibât-ı umûrdan olduğuna binâen cümle erbâb-ı vukūf ma‘rifetiyle râyic-i vakte nazaran takdîr olunan amele-i mütenevvi‘anın fiyat-ı mevzû‘alarını mübeyyin terkīm olunan defterdir ki zikr olunur. Tahrîren fî-5 S. sene [1]242. #&# [40a] Bayağı neccâr kalfası 1 yevmiyye, 200 para Kârhâneci 1 yevmiyye, 180 para Üstâd silici 1 yevmiyye, 160 para Üstâd neccâr 1 yevmiyye, 150 para Orta neccâr 1 yevmiyye, 140 para Bayağı neccâr [1] yevmiyye, 120 para Neccâr şâkirdi 1 yevmiyye, 100 para Üstâd marangoz 1 yevmiyye, 140 para Sıvacı işbaşısı 1 yevmiyye, 200 para Üstâd kalemkâr 1 yevmiyye, 180 para Bayağı kalemkâr 1 yevmiyye, 160 para Üstâd sâdeci 1 yevmiyye, 140 para Bayağı sâdeci 1 yevmiyye, 120 para Üstâd camcı 1 yevmiyye, 140 para Sıvacı ve camcı şâkirdi 1 yevmiyye, 100 para Üstâd suyolcu 1 yevmiyye, 160 para Taşçı kârhânecisi 1 yevmiyye, 180 para Üstâd taşçı 1 yevmiyye, 160 para Evsat taşçı 1 yevmiyye, 140 para Şâkirdi 1 yevmiyye, 80 para Hamamcı işbaşısı 1 yevmiyye, 180 para Üstâd hamamcı 1 yevmiyye, 150 para Bayağı hamamcı 1 yevmiyye, 120 para Doğramacı ve takıcı 1 yevmiyye, 120 para Duvarcı kalfası 1 yevmiyye, 180 para Üstâd duvarcı 1 yevmiyye, 150 para Bayağı duvarcı 1 yevmiyye, 100 para Tekneci 1 yevmiyye, 65 para Lağımcı işbaşısı 1 yevmiyye, 140 para Lağımcıyân 1 yevmiyye, 120 para Hammal-ı binâ 1 yevmiyye, 90 para Hizmetkârı 1 yevmiyye, 80 para Müslim ve re‘âyâ küfeci rençber 1 yevmiyye, 75 para Kaldırımcı 1 yevmiyye, 140 para Kettân kıyıcı 1 yevmiyye, 80 para Horasan hurde dökücü demirli kile 6 para Kaba horasan dökücü demirli kile 4 para Irgad başı ve hamalbaşı 1 yevmiyye, 110 para Mukābele şud.