İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 285 Hüküm no: 130 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mülga Yeniçeri ve Cebeci ocakları vakıf ve gelirlerinin tespiti emri Mülgā Yeniçeri ve Cebeci ocaklarının vakf ve musakkafâtları tahrîri zımnında ilmühaberdir. Evkāf-ı hümâyûn nâzırı sa‘âdetlü atûfetlü efendi hazretlerinin bir kıt‘a memhûr takrîri mefhûmunda mülgā Yeniçeri ve Cebeci ocakları ortalarının Dersa‘âdetim’in dâhil ve hâric-i sûrunda vakfiyet sûretiyle bir takım vakf musakkafâtları olup bir kalemde mukayyed olmadığından gayrı perâkende olduğundan etrâfıyla tahkīk ve zahîre ihrâc olunarak zabt ve idâreleri lâzımeden ve husûs-ı mezbûrun lâyıkı ile tahkīk ve zahîre ihrâcına bakılmadığı sûretde eyâdî-i nâsda kalarak telef olacağı bedîhiyâtdan olduğuna binâen ol bâbda arz olunan takrîr bâlâsına şeref-efzâ-yı sahîfe-i sudûr olan mübârek hatt-ı hümâyûn-ı şevket-makrûn-ı şâhâne ve sâdır olan fermân-ı âlî mûcebince o makūle musakkafâtın lâyıkı ile tahkīk ve zahîre ihrâcı’çün Evkāf-ı hümâyûn-ı şâhâne tarafından bir münâsib kimesne bi’l-intihâb memûr ve ta‘yîn kılınarak her biri mahallerinde mu‘âyene ve tahkīk-i madde olunarak ardı alındıkda usûl-i vakfa tatbîkan mikdâr-ı kemmiyyet ve keyfiyetlerini mübeyyin defteri arz ve takdîm kılınmak üzere kendiye havâle buyrulmuş olduğuna binâen muktezâ-yı irâde-i seniyye mûcebince musakkafât-ı mezkûrenin sırren ve alenen îcâbına göre etrâfıyla mahallerinde ve lâzım gelenlerden lâyıkı ile bi’t-taharrî tecessüs ve tahkīk ve zahîre ihrâc ile her biri başka başka mahallerinde bi’l-mu‘âyene tahkīk-i madde olunarak müceddeden sebt-i cerîde-i sıhhat olunması husûsunu tarafından bi’l-vekâle umûr-ı Evkāf-ı hümâyûn’da müstahdem Seyyid Mehmed Ragıb Efendi’ye ihâle kılınarak tahkīklerine şürû‘ ve mübâşeret ettirilmiş ise de o makūle musakkafât mutasarrıf ve müstecirleri ba‘zı esbâba mebnî yedlerinde olan senedâtı ihfâ ve ilgā ederek mülkiyyete tahvîl dâ‘iyesiyle ba‘zı mehâkim taraflarından hüccet mutâlebe ve ahzı vesâilinin istihsâline teşebbüs-birle hiyel ve hud‘aya sülûk edecekleri mülâhazadan gayr-ı ba‘îd olduğuna binâen mehâkim tarafından o makūle hüccet-i şer‘iyye taleb ve istid‘â vukū‘unda bir vechile tecvîz ve havâle-i sem‘ ve i‘tibâr olunmayıp tahkīk-i madde zımnında evvel emirde Nezâret-i Evkāf-ı hümâyûn tarafına gönderilmek üzere <> muhallefâta ve mehâkim taraflarına başka başka birer kıt‘a ilmühaberlerinin i‘tâsıyla taraf-ı hiyeliyenin seddi îcâb-ı maslahatdan idiğini tahrîr ve inhâ eylediği ecilden mûcebince <> muhallefâta kaydolup lâzım gelen mahallere ilmühaberleri verilmek fermân buyrulmağın mûcebince kaydolunup mehâkim-i sâire taraflarına ilmühaberleri verilmekle keyfiyet ma‘lûm olmak için İstanbul kādısı fazîletlü efendi hazretleri tarafına işbu ilmühaber verildi. Fî-gurreti Receb sene 1242.