İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 286 Hüküm no: 131 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dükkânları yanan Sipeh esnafının ellerinde bulunan silâhları satıp dükkânlarını yaptırdıkdan sonra giyecek satmalarına izin verildiği Sipeh pazarlı tâifesini dâir ilmühaberdir. Âsitâne-i aliyyede vâki‘ Sipeh pazarı esnâfının Bâb-ı âlî’ye takdîm eyledikleri bir kıt‘a arzuhâller mefhûmunda Çarşı-yı kebîr’de Batpazarı kurbünde kâin dekâkînde mukaddemâ esliha bey‘ ü şirâsıyla me’lûf iken harîkde muhterik oldukda fîmâ ba‘d esliha bey‘ ü şirâsıyla intifâ‘ edemeyecekleri zâhir olduğuna binâen rızâlarıyla keff-i yed ve yedlerinde bulunan envâ‘-ı eslihayı Bezzâstân-ı atîk’de fürûht ettirerek ba‘de’l-yevm dükkânlarını yapdırıp Batpazarı misilli esvâb bey‘ ü şirâsına teşebbüs murâd eyledikleri beyânıyla Batpazarı kethüdâsı bunlara dahi kethüdâ olarak sokaklarına bir yiğitbaşı nasb ve ta‘yîn ve ba‘d ez-în bunlar dahi Batpazarı esnâfı olarak sâye-i merhamet-vâye-i zıllullâhide ta‘ayyüşlerine müsâ‘ade buyrulmasını istid‘â ve istirhâm etmeleriyle İhtisâb ağası ma‘rifetiyle keyfiyeti bi’t-tahkīk iktizâsı i‘lâm olunmak üzere sâdır olan fermân-ı âlişâna imtisâlen istid‘âları yolunda olmağla içlerinden İsmail Ağa nâm kimesne ağa-yı mûmâ-ileyh ma‘rifeti ve cümlesinin intihâb ve iltimâsları ile Yiğitbaşı nasb olunduğundan bahisle niyâzlarına müsâ‘ade-i merâhim-âde-i seniyye erzân buyrulmak emr-i savâb idiği İstanbul Mahkemesi’nden i‘lâm olundukda i‘lâmı mûcebince amel olunup İhtisâb ve Mi‘mâr ağa taraflarına dahi ilmühaberi i‘tâ olunmak bâbında musahhah fermân-ı âlî sâdır olmağın mûcebince kaydolunup İhtisâb ağası tarafına başka ilmühaberi verilmekle Mi‘mâr ağa tarafına dahi işbu ilmühaber verildi. Fî 19 N sene 1242. İhtisâb ağası tarafına dahi ilmühaberi verilmişdir.