İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 286 Hüküm no: 132 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayında francalacı fırınlarında ekmek üretimi Bâ-sahh-ı âlî. İstanbul kādısı fazîletlü efendi ve İhtisâb ağası. Ramazan-ı şerîfde francalacı fırınlarında nân-ı azîz tabhına dâir. İşbu Ramazan-ı gufrân-nişanda Âsitâne-i sa‘âdet ve Bilâd-ı selâsede tabh ve i‘mâl olunan nân-ı azîz be-gāyet has olmak hasebiyle ibâdullâh francala ve çörek ve börek ve simid almadıklarından ba‘zı habbâzân fırınları destgâhlarında cem‘iyyet olmağın sâbıkda francalacı fırınlarında dahi Ramazan-ı şerîfde bayağı nân-ı azîz tabh ve i‘mâl olduğu zâhir idiğinden işbu cem‘iyyet def‘ oluncaya kadar francalacı fırınlarında dahi bayağı nân-ı azîz tabh ve i‘mâl ve habbâzân fırınları destgâhlarına îsâl olunması husûsu Habbâzân kethüdâ ve nizâm ustalarıyla bi’l-cümle francalacı esnâfına ekîden tenbîh ve telkīne dikkat ve hilâfı harekete cesâret ederi olur ise fîmâ ba‘d küşâ[d] olunmamak üzere o makūle francalacı fırınları sedd ü bend olunacağını gûş-ı hûşlarına ilkā ve tefhîme mübâderet eyleyesin deyü. Fî 4 N sene 1242.