İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 297 Hüküm no: 143 Orijinal metin no: [51b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Acem ve Efrenc tüccarlarının getirdikleri çeşitli kumaşların damga vergisi alındıkdan sonra alım ve satımının tülbentci esnafına bırakılması Bâ-sahh-ı âlî. İstanbul kādısı fazîletlü efendi. Dülbendci esnâfının tamgasına dâir. Dersa‘âdet’de kâin dülbendci esnâfının bir müddetden beri şürût ve nizâmlarına lâyıkıyla bakılamadığından bir takım muhtekir tâifesi Efrenc ve Acem diyârından ve tüccâr-ı sâireden iştirâ eyledikleri ecnâs-ı dülbend ve hâssa ve basma ve şal vesâir bu misilli emti‘a-i mütenevvi‘ayı ibâdullâha ve husûsuyla nisvân tâifesine gālî bahâ ile bey‘ ve fürûht ederek bu keyfiyet ibâdullâhın ızrârlarına bâdî ve aralık aralık ahvâl-i tüccâr dahi ekl ve bel‘ olunarak bî-hûde sızıldı hudûsundan başka esnâfın dahi perîşanî hâllerini müeddî olduğundan bahisle esnâf-ı merkūme beynlerinde mukaddemâ icrâ ve ba‘dehû terk ve imhâ olunan tamga resmi kemâ-fi’l-evvel ibkā olunmak ve esnâf-ı merkūmenin ber-mu‘tâd Haremeyn hazînesine veregeldikleri mebâliğ vesâir şürût-ı nizâmları hakkında bir gûne halel vukū‘u tecvîz olunmamak şartıyla müceddeden bir mahal tahsîsi ve hademeden biri dahi bu husûsa memûr kılınarak ba‘de’l-yevm Acem ve Efrenc vesâir tüccârın Dersa‘âdet’e getirdikleri dülbend ve hâssa ve basma ve şal vesâir bu misilli emti‘a-i mütenevvi‘anın küllîsi o makūle muhtekir tâifesi yedlerinden kurtarılıp bunların bey‘ u şirâsı kadîmi vechile dülbendci vesâir esnâfa tahsîs olunarak ba‘de’l-mübâya‘a mahâll-i mahsûsda tamgalanıp sonra esnâf-ı merkūmenin dükkân ve odalarına nakl ve beyne’l-esnâf tevzî‘ ve taksîm ile iktizâsına göre mücessem i‘mâl ve fürûht olunmak ve tamgaya memûr olan her bir eşyânın asl-ı mâlını tahkīk ve mücessem i‘mâl olunacak dülbendin mesârifini hesâb ve gerek mücessem ve gerek ecnâs-ı dülbend ve çitin üzerlerine kâr-ı şer‘îsi zammederek esnâf-ı merkūmenin ol vechile himâyetlerine dahi dikkat eylediği hâlde aceze-i nâs ve ale’l-husûs nisvân tâifesi bî-hûde ızrârdan vâreste olacağı esnâf-ı merkūme tarafından inhâ ve istid‘â olunup fî-nefsi’l-emr bu husûs bi’l-cümle ibâdullâh haklarında bir nev‘ fâide ve menfa‘atden hâlî olmayacağından bâlâda muharrer olan mevâddın lâyıkıyla icrâsı ve tamga rüsûmâtının dahi emâneten uhdesine ihâle [52a] olunan İhtisâb ağası ma‘rifetiyle tanzîmi husûsuna irâde-i seniyye-i mülûkâne ta‘allukuyla ol bâbda hatt-ı hümâyûn-ı şevket-makrûn-ı hazret-i hilâfet-penâhî sahîfe-pîrâ-yı sudûr olmuş ve keyfiyet tafsîlen Başmuhâsebe’ye kayd ü sebt ettidirilerek ağa-yı mûmâ-ileyh tarafına vesâir lâzım gelen mahalleri ilmühaberleri verilmiş olmağla imdi bundan böyle o makūle muhtekir tâifesinin Acem ve Efrenc vesâir tüccârın getirdikleri emti‘anın küllîsi kadîmi vechile dülbendci vesâir esnâf-ı tarafından mübâya‘a ettirilerek ağa-yı mûmâ-ileyh ma‘rifetiyle iktizâ eden tamga rüsûmu ahzıyla vaz‘-ı tamga olunup ba‘dehû esnâf-ı merkūmenin dükkân ve mahzenlerine nakl ve beynlerinde tevzî‘ ile asl-ı sermâyesi üzerine kâr-ı şer‘îsi dahi zam olunarak mu‘tedil ve ehven bahâ ile sattırılması ve bu bahâne ile eşyâ-yı merkūmenin fiyatı artmak ve bilâ-tamga taşra metâ‘ gitmek misilli vaz‘ ve hareket vukū‘a gelmemek üzere keyfiyeti bi’l-cümle iktizâ edenlere tefhîm ve tenbîh ve esnâfı küfelâya rabt ve tevsîk ederek iktizâ-yı maslahatın tanzîm ve icrâsına mübâderet dülbendci esnâfının ber-mu‘tâd ve Haremeyn hazînesine veregeldikleri mebâliği-i mezkûreye şimdiye kadar beynlerinde cârî ve mer‘î olan şürût ve nizâm-ı kadîmlerine dahi halel tatarruk etmemesi lâzımeden olduğuna binâen bu maddenin dahi îfâ-yı muktezâsına ihtimâm ve dikkat eyleyesin deyü. Fî 7 min-L sene 1242. Temmet bi’l-hayr. (Mühür) Abdurrahman