İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 357 Hüküm no: 177 Orijinal metin no: [64b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sokaklara ve çarşılara ekmek, yemek artıkları ve çöp atılmaması Süpründü fermânı Bâ-sahh-ı âlî İstanbul kādısı fazîletli efendi Dersa‘âdet ve bilâd-ı selâse sokakları has ü hâşâk ile mülevves olarak ta‘affünât zuhûruyla ümmet-i Muhammed müteezzî olmakda ve işbu eyyâm-ı mübârekede dahi ba‘zı hâne kapıları önlerine nân-ı azîz ve et‘ıme bakıyyesi döküldüğü görülmekde olduğuna binâen mugāyir-i hürmet me’kûlâtın bir vakitde yerlere dökülmemesi ve aralık aralık sokaklar ve çarşı süpürülüp tathîr olunması lâzım gelmiş ve bu husûs bilâd-ı selâse kādıları fazîletli efendilere fermân-ı âlî ısdârıyla başka başka tenbîh ve tekîd olunmuş olmağla imdi siz dahi herkes hâne ve dükkânları önlerine o makūle hürmeti lâzım ekmek dökmemelerini ve hâne ve dükkânları pîşgâhını tathîr eylemelerini ve her kimin hâne ve dükkânı önlerinde nân-ı azîz ve et‘ıme bakıyyesi ve mezbele ve süpründü görülür ise tedîb olunacaklarını bi’l-cümle esvâk ve pazar ve mahallât ahâlîsine ismâ‘ ve ihbâr ile fîmâ-ba‘d mahallât aralarında ve çarşı ve pazarda ekmek ve ta‘âm makūlesi ve süpründü bırakılmayarak bahra ilkā ettirmelerini tenbîhe dikkat ve siz dahi ale’d-devâm bu maddeye nezâret etmek üzere her mahallin temiz durması ve zinhâr ve zinhâr hürmeti vâcib nân-ı azîz ve ta‘âm bakıyyesinin hâne ve dükkân önlerine dökülmemesi ve hilâf-ı hareket edenler olur ise o makūlelerin tedîbleri icrâ olunacağı keyfiyâtını bi’l-cümle ahâlî-i mahallâta tefhîm ve telkīn eylemelerini eimme-i mahallâta ekîden tenbîhe mübâderet eyleyesün deyü Fî 6 N sene 1243