İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 356 Hüküm no: 176 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esnaf arasında tekelleşmeyi önlemek için daha önce çıkarılan fermanın iptali İnhisâra dâir olan fermân kaydı terkīni bâbında Bâ-sahh-ı âlî İstanbul kādısı fazîletli efendi Dersa‘âdet’de kâin terzi ve parçacı ve yaymacı ve fermeneci esnâfının sûret-i vâkı‘aları ve iki yüz otuz bir senesi târîhiyle müverrah sudûr etmiş olan emr-i âlî fermenecilerin yedlerinde oldukça inhisârdan kurtulamayacağı beyânıyla keyfiyetin hâk-i pây-ı hümâyûn-ı şâhâneden istîzânı lâzım geldiğini mübeyyin takdîm olunan takrîriniz tarafımızdan pîşgâh-ı ma‘âlî ve destgâh-ı hüsrevâneye lede’l-arz bu makūle şeylerde inhisâr câiz olmadığı zâhir ve âşikâr olduğundan tıbk-ı inhânız vechile târîh-i mezkûrda ısdâr olunan fermânın kaydı terkīn kılınarak inhisâr-ı mezkûrun men‘ u def‘iyle tanzîm ve icrâsına ibtidâr olunmak mazmûnunda hatt-ı şerîf-i şevket-redîf-i mülûkâne tırâzende-i sahîfe-i sudûr olmuş ve mantûk-ı münîfi üzere emr-i âlî-i mezkûrun kaydı terkīn ettirilmesi izzetli defterdâr efendiye bâ-buyruldu tenbîh kılınmış olmağla siz dahi îcâb ve iktizâsının icrâsına mübâderet eyleyesün deyü Fî 11 min B sene 1243