İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 374 Hüküm no: 196 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asakir-i Mansûre Ordusu’na asker yazılması Mahallâtdan Asâkir-i Mansûre’ye neferât idhâli Bâ-sahh-ı âlî Sa‘âdetlü atûfetlü serasker paşa hazretleri ve İstanbul ve Havass-ı Refîa ve Üsküdar kādıları fazîletli efendiler Fe-lillâhi’l-hamd ve’l-minne dâhil-i dâire-i intizâm olan Asâkir-i Mansûre-i Muhammediye’nin mensûb oldukları nâm-ı sâmî-i hazret-i risâlet-penâhî feyz ve meymenetine mazhariyetle bu sene-i mübârekede vukū‘ bulan muhârebâtda baş düşmanda sîne gererek ızhâr-ı sebât ve metânet ve tahsîl-i dest-mâye-i fevz ve gālibiyet eyledikleri meşhûd ve bu cihetle asâkir-i merkūmenin gün be-gün teksîr ve tevfîri ehass-ı matlûb ve maksûd idüğü bedîhî ve rû-nümûde olduğuna binâen ber-muktezâ-yı irâde-i seniyye bu def‘a küşâd olunan Asâkir-i Mansûre tabûrları için taşra sancaklardan tertîb olunmuş olan asâkirin bi’l-ikdâm tamamen celb ve tahrîrlerine bakılmakda ise de zât-ı şevket-meâb-ı mülûkâneye mahsûs olmak üzere tertîb ve küşâd buyrulmuş olan [69a] asâkir-i hâssa tabûrlarının dahi hadd-i lâyıkında bulunması lâzimeden ve-lillâhi’l-hamd ve’l-minne dârü’s-saltanatü’s-seniyye sevâd-ı a‘zam ve sekenesinin bi’l-hâssa isti‘dâd ve kābiliyet-i mâderzâdları muktezâsından olarak Asâkir-i Mansûre-i Muhammediye silkine hâhişleri vâzıhât ve şimdiye kadar kendisinin ve hâhişleriyle asâkir-i hâssaya Dersa‘âdet sekenesinden haylice asâkir tahrîr olunduğu misillü Âsitâne-i sa‘âdet-âşiyâna ve havâlîsi mahallâtı ahâlî ve sekenesinden iktizâsına göre mütehammil olan mahallerinden bi’l-intihâb mahallât imâmı ve vücûhları ma‘rifetleriyle münâsib olanlardan birer ikişer üçer beşer neferin kendi hâhiş ve istekleriyle tertîb ve tedârik ve asâkir-i hâssa-i şâhâne silkine idhâl olunması husûsu irâde-i seniyye-i mülûkâne muktezâsından olmağla ber-minvâl-i muharrer Dersa‘âdet ve havâlîsi mahallâtı ahâlîsi ve sekenesinden kendi istekleriyle münâsibi vechile asker tahrîr ve tertîbi râbıta-i hasenesini ikmâle mübâderet ve icrâ-yı muktezâ-yı irâde-i seniyyeye sarf-ı mâ-hasale makderet eyleyesiz deyü Fî 29 C sene 1244