İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 375 Hüküm no: 199 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Savaş esnasında kullanılmak üzere ‘cihadiye’ adıyla gümüş sikke basılması Cedîd cihâdiye darbı husûsuna dâir İstanbul kādısı fazîletli efendi Cümleye ma‘lûm olduğu üzere el-hâletü hâzihî kaç senelerdir taraf-ı Devlet-i aliyyeden Rum eşkıyâsının tedîb ve gûşmâl ve taht-ı ra‘iyyete ircâ‘ ve idhâlleri için ibrâz olunan ikdâmât-ı mütevâliye ve ale’l-husûs asl-ı adüvv-i dîn ü devlet olan Moskovlunun dahi i‘lân-ı harbi vukū‘uyla sefer-i hümâyûn îcâb ederek bir seneden beri bi-avni’llâhi te‘âlâ Rumeli ve Anadolu taraflarında ve sevâhil câniblerinde müte‘addid ordu ve mu‘askerler ve bahren ihrâc olunacak donanma-yı hümâyûn tanzîmâtı için icrâ olunmuş ve olunmakda olan tertîbât-ı külliyenin inşâallâhu te‘âlâ bu sene-i mübârekede ber-vefk-i matlûb semere-i celîlesi müşâhedesiyle kâffe-i ümmet-i Muhammed’i karîben şu beliyye-i müstevliyeden istihlâs için her bir tertîbât ve tedârükâta evvelkiden on kat ziyâde ikdâm ve ihtimâm olunmak lâzım gelmiş ve bu cihetle tetimmât-ı harbiyeden olan mühimmât-ı cihâdiye ve zehâir-i külliye ve asker aylıkları ve sâir levâzımât ve mukteziyâtın bilâ-kusûr mihver-i lâyıkında idâre ve rü’yeti için hazâin-i beytülmâlin tevfîri sûretine bakılmak îcâb edip ale’l-husûs böyle vakitde mu‘âmelât-ı nâsın teshîline medâr-ı küllîsi olan nukūd-ı simin teksîri iktizâ eylemiş olmakdan nâşî mücerred teshîl-i maslahat-ı cihâdiye ve def‘-i zarûret-i âmme için vakt ü hâle göre gaşiyy-i hâlisinden artık olarak muvakkaten bir nev‘ sim sikke-i hasene darbı emr-i meşrû‘ olduğu bu def‘a bâb-ı fetvâ-penâhîde akd olunan encümen-i şûrâda taraf-ı şer‘-i enverden beyân ve iftâ olunduğundan böyle kâffe-i memâlik-i mahrûsede tedâvül etmek ve bi-mennihî te‘âlâ hitâm-ı gavâil-i seferiyede yine sikke-i haseneye tebdîl olunmak üzere gaşiyy-i hâlisinden artık ve cihâdiye ismiyle müsemmâ olarak nev‘-i cedîd sim sikke-i şâhâne kat‘ ve darb olunması ittifâk-ı ârâ ile karâr-gîr olduğundan teshîlen li-mesâlihi’l-ibâd ol vechile tanzîm ve icrâsı husûsuna irâde-i hayriyet-âde-i hazret-i hilâfet-penâhî müte‘allik buyrulup ol bâbda sahîfe-i pîrâ-yı sudûr buyrulan hatt-ı hümâyûn-ı şevket-makrûn-ı cenâb-ı cihânbânî mantûk-ı münîfi üzere beş guruşluk ve yüz paralık ve bir guruşluk olmak üzere mücedded sikke-i şâhâne kat‘ ve darb olunmuş olduğu bu def‘a Anadolu ve Rumeli’nin avcı? kullarına ve sâir lâzım gelen mahallere evâmir-i şerîfe-i mülûkâne neşr ve tisyârıyla işâ‘a ve i‘lân olunmuş ve el-yevm Darbhâne-i âmirede kat‘ ve darb olunmakda olan hayriye ismiyle müsemmâ altın sikke-i hasene-i mülûkâne kemâ-kân kat‘ ve darb olunacağından bu vesîle ile gerek zikr olunan hayriye sikke-i hasenesinin ve gerek mukaddem ve mu’ahhar bi’d-defe‘ât tekîd olunan ecnâs-ı nukūd-ı atîkanın zinhâr fiyat-ı mukarrerelerinden bir akçe ziyâde alınıp verilmemesi ve ziyâdeye alıp vermeğe cesâret eden her kim olur ise olsun bilâ-emân tedîbât-ı lâyıkası icrâ olunacağı tehdîdâtı bildirilmiş olmağla imdi siz dahi keyfiyeti ya‘ni işbu sikke-i cedîde-i şâhâne bi-mennihî te‘âlâ ba‘de-hitâmi’l-gāile asl-ı sikke-i hasene-i mülûkâneye tebdîl olunmak üzere muvakkaten kâffe-i memâlik-i mahrûsede tedâvül edeceği misillü Dersa‘âdet’de dahi beyne’n-nâs tedâvülüyle gerek bunların ve gerek hayriye altını ve sâir ecnâs-ı nukūd-ı atîkanın zinhâr fiyat-ı mukarreresinden bir akçe ziyâdeye alınıp verilmemesi husûsunu bi’l-cümle mahallât imâmlarını ve sâir îcâb edenleri nezdinize celb ile gûş-i hûşlarına ilkā ve tefhîme mübâderet ve bu maddeye tarafınızdan dahi ale’d-devâm i‘tinâ ve nezâret eyleyesiz deyü Fî 19 B sene 1244