İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 377 Hüküm no: 200 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ekmeğin mahallelere gelen satıcılardan alınması, fırınların önünde kalabalık oluşturulmaması Nân-ı azîz mahallere tabla nizâmı İstanbul kādısı fazîletli efendi Dârü’s-saltanatü’s-seniyye ve bilâd-ı selâsede mutavattın ibâdullâhın rûz-merre muhtâc oldukları nân-ı azîze muktezî olan hınta habbâzâna sâbıkı vechile tamamen i‘tâ olunmakda ve fırınlarda dahi nân-ı azîz kadîmi ve sâbıkı vechile tabh kılınmakda ise de ekser-i nâs lüzûmundan ziyâde olarak ve mahallelerine tablakârların götüreceği nân-ı azîze bakmayarak fırınlardan ziyâde nân-ı azîz almak dâ‘iyesine düşdüklerinden fırınlar pîşgâhında kalabalık görülmekde ve bu keyfiyet Rum ve Ermeni ve Yahûd milletlerinin kemâl-i tehâcümlerinden neş’et etmekde oluduğuna binâen husûs-ı mezbûrun bir râbıta tahtına idhâli lâzım gelerek gerek ehl-i İslâm ve gerek re‘âyâ sâkin olduğu mahallelere tablakârlar ile iktizâ eden nân-ı azîz gönderilmek üzere me’mûrlarına tenbîh olunmuş ve fîmâ-ba‘d milletlerinden böyle fırınlar önlerinde kalabalık etmeğe cesâret ederi olur ise derhâl tedîbât-ı şedîde icrâ olunacağını milletlerine ifâde ve bu maddeye dikkat ile fırınlar önlerinde re‘âyâdan birinin bulunmaması husûsuna be-gāyet ihtimâm eylemeleri patriklere ve hahambaşıya beyâz üzerine [70a] başka başka fermân-ı âlî ısdârıyla tenbîh ve tekîd kılınmış ve ehl-i İslâm’dan dahi o misillü tablakârların mahallelere götürecekleri nân-ı azîze kanâ‘at etmeyip lüzûmundan ziyâde almak dâ‘iyesiyle fırınlar pîşgâhında kalabalık vukū‘una sebeb olanlar her kim ise tedîb olunacaklarını mahalleleri ahâlîsine tefhîm eylemelerini eimme-i mahallâta tenbîh etmeleri fazîletli bilâd-ı selâse kādıları efendilere ve ihtisâb ağasına dahi bildirilmiş olmağla siz dahi keyfiyeti bu vechile eimme-i mahallâta beyân ve ifâdeye dikkat ve ba‘d-ez-în hilâf-ı fermân-ı âlî fırınlar önlerinde öyle kalabalık vukū‘ bulmaması husûsuna ale’d-devâm ihtimâm ve nezâret eyleyesiz deyü. Fî 11 Ş sene 1244