İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 401 Hüküm no: 222 Orijinal metin no: [76b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeterli miktarda asker toplanması nedeniyle silah altına alınan esnaf ve memurların işlerine dönmesi İstanbul kādısı fazîletli efendi Ahvâl-i hâliye-i ma‘lûmeden nâşî civâr-ı saltanat-ı seniyyede ve Karaburun ve havâlîsi muhâfazalarında istihdâm olunmak üzere tez elden Dersa‘âdet’ten esnâf kethüdâları ma‘rifetleriyle bi’l-cümle esnâfın eli silâh tutarlarının tertîb ve atûfetlü serasker paşa hazretleri ma‘iyyetiyle ihrâc olunmaları bâ-fermân-ı âlî tenbîh olunmuş ise de bugünlerde lillâhi’l-hamd ve’l-minne Anadolu cânibinden gelmiş olan asâkir Karaburun ve Terkos havâlîsi muhâfazasına ta‘yîn ve ihrâc olunmuş ve bir tarafdan dahi asâkir-i vâfiye gelmekde olduğundan muktezî olan mahallere yerleşdirilecek idüğüne ve İstanbul esnâfının dahi ekserîsi hıdemât-ı mühimme-i seferiyede müstahdem olageldiklerine binâen hem mühimmât-ı seferiye ve levâzımât-ı sâirenin beyhûde ta‘tîlini mûcib ve hem kâr u kesblerinden tebâ‘udü müstevcib olmamak için tertîb olunan bi’l-cümle esnâfın kemâ-fi’s-sâbık kâr u kisb ve herkes san‘atlarıyla meşgūl olmak üzere eslihalarını ve melbûsât-ı seferiyelerini çıkarıp me’lûf oldukları işlerinde <> bulunmaları tensîb olunarak bi’l-cümle esnâf kethüdâlarını nezdine celb ile ber-minvâl-i muharrer silâhlarını çıkarıp kemâ-fi’s-sâbık işleriyle meşgūl olmalarını ve ba‘d-ez-în bunlardan bir kimesne müsellah bulunur ise ma‘rifetiyle ahz u girift ve tedîbât-ı lâyıkaları icrâ olunacağını güzelce tenbîh ve tefhîme himmet eylemesi serasker-i müşârun-ileyh hazretlerine ifâde olunmuş ve keyfiyet ihtisâb ağasına dahi bildirilmiş olmağla siz dahi bu maddeye alâ-mâ-yelîk ihtimâm ve nezâret eyleyesin deyü Fî 29 S sene 1245 Serasker paşa hazretlerine hitâben sâdır fermân-ı âlîden kaydolmağın ânifen efendi hazretlerine hitâben sâdır olan emr-i âlîden kayd ve tashîh şud.