İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 399 Hüküm no: 221 Orijinal metin no: [76b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beş vakit namazın cemaatle kılınması Evkāt-ı hamse-yi cemâ‘at ile edâya tenbîh İstanbul kādısı fazîletli efendi Nûr-i îmân ile münevverü’l-kulûb olan bi’l-cümle müminîn-i muvahhidîne göre ferâiz-i ilâhîye ve sünnet-i seniyye-i hazret-i nebeviyyeye imtisâl ile gücü yettiği kadar hayır ve salâh tarafına sa‘y ü himmet eylemek lâzimeden ve bi’l-husûs cümlenin i‘tikād-ı tâm ile mu‘tekıdi olduğu vechile beş vakit namaz imâd-ı dîn-i mübîn ve rükn-i rekîn-i şe‘âir-i Müslimîn olmak üzere emr-i kat‘î-i ilâhî ile herkesin üzerine farz-ı ayn olmak hasebiyle hiçbir özür ve illet ile terkine tarîk-i imkân olmadığı misillü işbu evkāt-ı hamseyi cemâ‘atle edâ etmek sünnet-i müekkede olarak özr-i sahîh-i şer‘î olmaksızın terki bir vechile câiz olmadığına ve lillâhi’l-hamd ve’l-minne dârü’l-hilâfeti’l-aliyyede bu kadar cevâmi‘ ve mesâcid mevcûd ve meksûf idüğüne binâen herkes üzerlerine farz olan evkāt-ı hamseyi cevâmi‘ ve mesâcidde ve dâirelerinde imâmı olanlar kendi dâirelerinde ve belki civâr câmi‘ ve mescidde bulundukları sûretde ekseriyâ onlar dahi cevâmi‘-i şerîfede cemâ‘atle kılıp sünnet-i müekkedeyi edâ eylemek ve kırâet-i ezân-ı Muhammedî akībinde hazret-i seyyidü’l-enâm aleyhi efdâlü’s-salâti ve’s-selâm efendimize salât ve selâm getirmek ve vakit buldukça tilâvet-i Kur’ân-ı azîmü’ş-şân ve sâir tesbîh ve tehlîl misillü ibâdet ü tâ‘ât ile ve vus‘u mertebe cenâb-ı rabbi’l-âlemîne kulluk etmeğe çalışmak şân ü şi‘âr-ı İslâmiyet’den olarak devâm ve icrâsını nice nice fevâid-i dünyeviye ve menâfi‘-i uhreviye olduğunda şübhe olmadığına mebnî bu husûslar aralık aralık tenbîh ve tekîd ile biraz vakit devâm olunur ise de günden güne gevşeyerek yine evvelki hâle rücû‘ olunmakda olup hattâ el-hâletü hâzihî evkāt-ı hamsede cevâmi‘ ve mesâcidde bulunan cemâ‘at-ı Müslimîn birkaç safdan ibâret idüğü meşhûd olduğundan ve ezân-ı şerîf kırâeti akībinde cenâb-ı risâlet-penâhîye salât ü selâm ityânında kusûr olunduğundan bu missillü şe‘âir-i İslâmiye ve âdâb-ı şer‘iyede tehâvün ve taksîr olunması mugāyir-i emr-i bârî ve menâfi‘-i rızâ-i cihândârî olmakdan nâşî mecmû‘-ı millet-i İslâmiye’nin dîn ü dünyâlarını vikāyeten bu def‘a dahi müekked tenbîh ve ikāz ile fîmâ-ba‘d imâmı olanlar hânelerinde olmayanlar cevâmi‘ ve mesâcidde beş vakit namazı cemâ‘atle edâ eylemeleri ve akīb-i ezân-ı şerîfde ve beher gün vakt-i seherde bi’l-cümle minârâtda ve akīb-i ferâiz-i mektûbede cenâb-ı nübüvvet-penâhîye salât ü selâm olunması ve sâir güne ibâdât ü tâ‘ât ile hasbe’l-imkân hayr u salâh tarafına sa‘y ve kûşişte tecvîz-i kusûr olunmaması husûslarına irâde-i seniyye-i şâhâne müte‘allik olarak keyfiyeti bu vechile îcâb edenlere tenbîh ve ifhâm eylemeleri bilâd-ı selâse kādıları fazîletli efendilere başka başka beyâz üzerine fermân-ı âlî ısdârıyla tenbîh olunmuş olmağla imdi siz dahi eimme-i mahallâtı celb ile işbu irâde-i hayriyeyi mahalleleri ahâlîsine ferden ferdâ tefhîm ederek her kim mükellef olduğu ferâizi cemâ‘atle edâda terâhî eder ise bulunduğu mahalle imâmı isim ve şöhretiyle tarafınıza ifâde edip tarafınızdan dahi îcâb-ı şer‘îsi ne olduğu Bâbıâlî’ye inhâ olunarak lâzım gelen tedîb-i şer‘îsi icrâ kılınmak ve ber-minvâl-i muharrer akīb-i salât-ı mefrûzada ve ezân-ı Muhammedî tekmîlinde ve bi’l-husûs küllü yevm vakt-i seherde bi’l-cümle minârâtda zât-ı hazret-i risâlet-penâhîye salât ü selâm olunmak ve sâir âdâb-ı şer‘iye ve şe‘âir-i İslâmiye’ye dikkat ve ihtimâm kılınmak üzere bir râbıta-i kaviyyeye rabt ile ba‘d-ez-în hilâfı hareket vukū‘a getirilmemesi emr-i ehemmine dâimâ ve müstemirren i‘tinâ ve himmet eyleyesin deyü. Fî 14 S sene 1245