İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 412 Hüküm no: 232 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanan evlerin yerine yenilerinin yapılması Muhterık arsaları binâ ve tahta kaplamasına dâir emr-i âlî İstanbul kādısı fazîletli efendi Bi-hikmeti’llâhi te‘âlâ Dersa‘âdet ve havâlîsinde mukaddem ve mu’ahhar harîkler vukū‘uyla ashâbı i‘tibâr sûreti göstermeyerek hâli üzere vîrâne kalmış ve fukarâdan olanlara bir şey denilemez ise de zî-kudret olanlar dahi hâne ve konaklarını inşâ etmeyip kimi vakt ü hâli mülâhaza ederek ve kimi dahi ba‘zı evhâm-ı beyhûdeye zâhib olarak teennî ve te’ehhur sûretini tutmuş oldukları zâhir olup hamden lillâhi te‘âlâ vakt ü hâl âsâyiş üzere olarak dârü’s-saltanatü’s-seniyyenin i‘mârı ehass-ı matlûb-ı âlî ve cümlenin arâmiş ve rahatı nezd-i merhamet-vend-i mülûkânede maksûd ve merzâ olduğundan gerek ulemâ ve ricâl ve ketebe ve hademe ve gerek esnâf ve sâir zî-kudret olanlar o makūle muhterık olan hânelerini ve yâhud diledikleri mahallerde hâne ve sâhilhâneler inşâ ve esbâb-ı âsâyişleri icrâ ile devâm-ı ömr ve şevket-i şâhânene i‘tinâ eylemeleri muktezâ-yı emr u fermân-ı kerâmet-unvân-ı mülûkâneden olmağla eimme-i mahallâtı celb ile hiç ferd beyhûde evhâma zâhib olmayarak muhterık olan hâne ve sâhilhânelerini matlûbları vechile inşâ ve sâir diledikleri mahallerde dahi hâne ve konaklar îcâd ederek sâye-i himâye-vâye-i şâhânede esbak üzere olmalarını büyük ve küçük mahalleri ahâlîsine ifâde eylemelerini tenbîhe mübâderet ve tahta kaplaması mukaddem memnû‘ ise de el-hâletü hâzihî inşâ edecekleri hânelerini herkes tahta kaplamak ve sıvatmak sûretlerinde muhayyer olarak bu keyfiyet me’mûrlara tenbîh ve i‘lân kılındığı beyân ve tefhîme dikkat eyleyesin deyü Fî 13 L sene [12]45