İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 413 Hüküm no: 233 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadınların boş yere çarşı ve pazarlarda dolaşmaması ve açık yaşmak ile gezmemesi Tâife-i nisâya dâir emr-i âlî İstanbul kādısı fazîletli efendi Tâife-i nisvân nâ-mahrem olarak dâimâ kendilerini setr etmek ve hasbe’z-zarûr çarşı ve pazara çıksalar bile ırz ve edebleriyle gezip işlerini ba‘de’r-rü’ye mahallerine avdet eylemek îcâb eder iken bir takım nisvân bed renk ferâce giyip açık saçık yaşmak ile çarşı ve pazarda gezmek ve beyhûde dükkânlar önlerinde tevkīf ile gûnâ gûn fezâhat vukū‘una sebeb olmakda olduklarından nisvânın ehl-i ırza mahsûs olan yaşmak ve ferâce ile mesâlih-i zarûriyeleri zuhûrunda sokağa çıkıp işlerini gördükden sonra beyhûde geşt ü güzâr etmemeleri mukaddem ve mu’ahhar ve bi’l-husûs Ramazan-ı şerîf içinde iktizâsına göre îcâb edenlere fermânlar tasdîriyle tenbîh olunmuş ise de yine mütenebih olmayarak bir takım nisvân evvelkiden ziyâde yakışmaz hey’etle çarşılarda geşt ü güzâr ve cevâmi‘-i şerîfe havluları ve türbeler ve sâir kalabalıklı mahallerde tevakkufa ibtidâr ve askerî tâifesine ve sâire harf-endâzlık etmek misillü habâsete ictisâr ve ibtidâr eyledikleri meşhûd olarak fîmâ-ba‘d o misillü açık yaşmak ve bed renk ferâceler ile nisâ tâifesi sokaklarda görüldüğü ve kadın yaşmağı ta‘bîr olunur yaşmağa ri‘âyet olunmadığı hâlde o misillüler zâbitân ve me’mûrlar ma‘rifetiyle tutularak haklarında eşedd-i ukûbet ne ise icrâ kılınması muktezâ-yı emr u fermân-ı şâhâneden olmağla bi’l-cümle eimme-i mahallâtı nezdinize celb edip nisâ tâifesi ba‘d-ez-în işbu âdet hükmüne koydukları hey’et-i menhûselerini terk etmeyip de yine açık yaşmak ve bed renk ferâceler ile çarşı ve pazarda gezer ve beyhûde dükkânlar önlerinde durur ise zâbitân ve me’mûrlar taraflarından tutularak o makūleler bilâ-emân nefy ve iclâ ve belki deryâya ilkā ve erleri haklarında dahi eşedd-i ukûbet icrâ olunacağını mahalleleri ahâlîsine ekîden tenbîh etmelerini bi’l-etrâf ifâdeye dikkat ve mübâderet eyleyesin deyü Fî 13 L sene [12]45