İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 465 Hüküm no: 270 Orijinal metin no: [94b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazanda davetsiz olarak iftarlara gidilmemesi Bâ-sahh-ı âlî Ramazan-ı şerîfde bilâ-da‘vet bir mahalle gitmemek için emir İstanbul kādısı fazîletli efendi Cümleye ta‘rîfden müstağnî olduğu üzere cemî‘ zamânda telef ü serefden mücânebet muktezâ-yı diyânetden olduğuna ve Ramazan-ı şerîflerde âdet olan iftâr tekellüfâtı râddesini aşıp bilâ-da‘vet her bir mahalle azîmet nass-ı kātı‘ ile memnû‘ bulunduğuna binâen birkaç seneden beri Bâbıâlî ve Bâb-ı fetvâ-penâhîde resm-i iftârların terk olunmuş ve hattâ geçen sene ta‘mîm olunarak lâzım gelenlere buyruldular neşriyle fîmâ-ba‘d Ramazan-ı şerîflerde vüzerâ-i izâm ve ulemâ-yı kirâm ve ricâl-i Devlet-i aliyye-i ebed-kıyâm ve sâir hâs ve âmmın zinhâr bilâ-da‘vet iftâra azîmet tekellüfünü ihtiyâr etmemesi ve ba‘zı zî-kudret kimesneler civârlarında bulunan talebe-i ulûm ve şâyeste-i ikrâm olanları hânelerine celb ve da‘vet ve it‘âm-ı ta‘âm etmelerine diyecek olmayıp ancak bilâ-da‘vet sıklet olmakdan mücânebet olunması bâ-irâde-i seniyye-i şâhâne tenbîh kılınmış olduğuna binâen tekrar tekîde hâcet yok ise de el-hâletü hâzihî şehr-i şerîf-i Ramazan-ı kesîrü’l-feyezân takarrüb etmiş ve usûl-i mezkûrenin ilâ-mâşâallâhu te‘âlâ icrâsı matlûb olarak bu def‘a dahi lâzım gelenlere tenbîh olunmuş olmağla siz dahi bi’l-cümle eimme-i mahallâtı celb ile ber-minvâl-i meşrûh bu husûsun ilâ-mâşâallâhu te‘âlâ düstûrü’l-amel tutulması irâde-i seniyye iktizâsından idüğünü mahalleleri ahâlîsine ifâde ve beyân etmek üzere tenbîhe dikkat eyleyesin deyü. Fî 25 Ş sene 1246 Temmü’l-kelâm fî-hâze’l-makām Nemakahû el-fakīr ileyhi azze şânühû Es-Seyyid Abdürrahim el-kādı be-dârü’l-hilâfeti’l-aliyye Gufire leh [Mühür: Abdurrahim] [95a-95b BOŞ]