İstanbul Mahkemesi 154 Numaralı Sicil (H. 1237-1246 / M. 1822- 1831) cilt: 88, sayfa: 464 Hüküm no: 269 Orijinal metin no: [94b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan ayında ekmeğin kalitesinin bozulmamasına dikkat edilmesi Bâ-sahh-ı âlî Ramazan-ı şerîfde nân-ı azîze dâir İstanbul kādısı fazîletli efendi Ramazan-ı kesîrü’l-feyezânda Dersa‘âdet ve bilâd-ı selâsede mutavattın ibâdullâhın sâye-i merhamet-vâye-i hazret-i mülûkânede tena‘um edecekleri nân-ı azîzin ecnâs-ı hıntadan tertîb ve tabh ile takdîm olunmuş olan numûnesi bâ-takrîr huzûr-ı kerâmet-me’ser-i cenâb-ı pâdişâhîye arz olundukda numûne-i mezkûr vechile bi-mennihî te‘âlâ Ramazan-ı şerîfin hitâmına kadar zerrece kesb-i tagayyür etmemek ve eğer kereste ve tabhında tenezzül görülür ise mütecâsir olanlar tedîb olunmak üzere me’mûrlara tenbîh ve ale’d-devâm dikkat olunması husûsuna irâde-i seniyye-i şâhâne ta‘allukuyla ol bâbda hatt-ı şerîf-i inâyet-redîf-i tâc-dârî levha-zîb-i sudûr buyrulmuş ve iktizâsı vechile keyfiyet zahîre nâzırı ağaya tenbîh kılınmış olmağla siz dahi tabh olacak nân-ı azîzin kereste ve levni ve sûreti tabhı bir vechile tenezzül ve tagayyür etmemesine kemâl-i mertebe dikkat ve eyyâm-ı mübârekede ibâdullâhdan zât-ı hümâyûn-ı şâhâneye du‘â aldırılacak bir madde-i hayriye olduğuna mebnî kesret üzere gezilerek dâimâ ihtimâm ve i‘tinâ ile hilâfı harekette bulunanların tedîbât-ı lâyıkaları icrâ olunmak üzere Bâbıâlî’ye irsâllerine mübâderet eyleyesin deyü. Fî 21 Ş sene 1246