İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 57 Hüküm no: 7 Orijinal metin no: [1b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa’nın uhdesinde bulunan berber gediğini Mahmud Ağa’ya sattığı Berber mübâya‘ası Mahmiye-i İstanbul’da Azebler kurbünde Hoca Halil Attâr mahallesinde sâkin el-Hâc Mustafa Ağa b. Ömer meclis-i şer‘-i münîrde şekerci esnâfından işbu bâ‘isü’l-kitâb es-Seyyid Mahmud Ağa b. es-Seyyid Mustafa mahzarında ikrâr-ı tâm ve takrîr-i kelâm edip mahalle-i mezkûrede menzilim tahtında kâin bir bâb berber dükkânı derûnunda mevcûde Başmuhâsebe Kalemi’nde Sırmabıyık Mehmed Usta ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye müstakıllen yedimde mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer’î ve safka-i vâhide ile merkūm es-Seyyid Mahmud Ağa’ya bin beş yüz elli guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl edip semen-i mezkûr bin beş yüz elli guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte’allika âmme-i da’vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteri-i merkūm es-Seyyid Mahmud Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 27 Şa‘bâni’l-mu‘azzam sene 1246 Şuhûdü’l-hâl: Kethüdâvekîli İbrahim Ağa, Şeyh Mustafa Efendi, Du‘âcı İsmail Efendi, Çavuş el-Hâc Abdurrahman, Köşeustası Hacı Ahmed