İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 57 Hüküm no: 8 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhzır İsmail Ağa’nın berber dükkânı gediği hissesini rehin göstererek borçlandığı İdâne-i rehn-i berber Kaydı terkīn şüd Fî 16 S sene [1]255 Mahmiye-i İstanbul’da Ayasofya-i sagīr kurbünde Kapıağası Hüseyin Ağa mahallesinde sâkin Kısmet-i Askeriye Mahkemesi muhzırânından İsmail Ağa b. Hüseyin meclis-i şer‘-i şerîf-i enverde işbu bâ‘isü’l-kitâb Meddah Osman Efendi b. Musa mahzarında ikrâr-ı tâm ve takrîr-i kelâm edip işbu târîh-i kitâb günü merkūm Osman Efendi yedinden iktirâz edeceğim üç bin guruş mukābelesinde mahmiye-i mezbûre hısnı ebvâbından Çatladıkapı hâricinde leb-i deryâda kâin bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeden bâ-hüccet-i şer‘iye mâlik olduğum nısf hissemi rehin vaz‘ ve merkūm Osman Efendi yedine teslîm eylediğimde ol dahi ber-vech-i muharrer irtihân ve kabz ve kabûl eyledikden sonra merkūm Osman Efendi bana mâlından üç bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk etmemle meblağ-ı mezkûr üç bin guruş merkūm Osman Efendi’ye zimmetimde sahîhan edâsı vâcib deynimdir dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şa‘bân sene 1246 Şuhûdü’l-hâl: Eş-şâhidûnü’s-sâbikūn