İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 70 Hüküm no: 23 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmügülsüm Hanım’ın arsasını Hüseyin Ağa’ya sattığı Sultan Selim’de arsa mübâya‘ası Mahmiye-i İslambol’da Çarşambapazarı kurbünde Cebeci mahallesinde sâkine ve zâtı zeyl-i vesîkada mektûbü’l-esâmî Müslimîn ta‘rîfleriyle mu‘arrefe olan Ümmügülsüm Hatun bt. el-Hâc Mehmed meclis-i şer‘-i münîrde Anadolu kuzâtı eşrâfından işbu râfi‘u’l-kitâb el-Hâc Hüseyin Efendi b. Mustafa mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülküm olup mahalle-i mezkûrede vâki‘ iki tarafdan mûmâ-ileyh el-Hâc Hüseyin Efendi’nin binâya şurû‘ eylediği menzili ve bir tarafdan mevâlî-i i‘zâmdan Kapan Nâibîzâde fazîletlü Abdülhalim Efendi bahçesi ve bir tarafdan tarîk-i âm ile mahdûd ve tahmînen iki yüz yetmiş beş zirâ‘ bir bâb muhterik menzil arsamı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile mûmâ-ileyh el-Hâc Hüseyin Efendi’ye üç yüz yetmiş beş guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç yüz yetmiş beş guruşu bana tamâmen ve kâmilen def‘ ü teslîm ve ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âm ile ibrâ ve iskāt eyledik fî-mâ ba‘d arsa-i mezkûrede benim aslâ ve kat‘â alâka ve medhalim kalmayıp mûmâ-ileyh el-Hâc Hüseyin Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 19 L sene [1]246 Şuhûdü’l-hâl: Kuzâtdan Mehmed Efendi b. Osman, Anadolu kuzâtı eşrâfından Mehmed Esad Efendi, eşrâf-ı kuzâtdan Muhtar-ı evvel el-Hâc İsmail Efendi, Molla Hüseyin b. Yusuf, Bevvâb Hafız Ali Efendi ve ga[yruhum]