İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 68 Hüküm no: 22 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tophane-i âmire Nazırı Hâdî Efendi’nin uhdesinde bulunan evini ve beş yüz kuruşunu vakfettiği Mâ-tazammene hâze’l-kitâbü’l-celîl mine’l-vakfi ve’t-tescîl ücriye bi’l-kabûli bilâ-irtiyâb ve’l-hükmü bi’s-sıhhati ve’s-savâb allâhümme ic‘al sa‘ye’l-vâkıfi mebrûren ve hayrahu fi’d-dâreyni meşkûran nemekahü’l-fakīr ile’l-alîm es-Seyyid Abdurrahim el-kādı bi-Dârü’s-saltanati’s-seniyyeti -gufira-leh-. Vakfiye-i Hâdî Efendi, Tophâne-i âmire Nâzırı hâlâ Elhamdülillâhi Rabbi’l-âlemîn ve’s-salâtü ve’s-selâmü alâ-seyyidinâ Muhammedin ve alâ-âlihi ve ashâbihî ecma‘în ammâ ba‘d işbu kitâb-ı mişkîn-nikābın ketb ü tahrîr ve sebt ü tastîrine bâdî oldur ki e‘âzım-ı ricâl-i Devlet-i aliyye’den hâlâ Tophâne-i âmire Nâzırı sa‘âdetlü semahatlü atûfetlü es-Seyyid Mehmed Hâdî Efendi b. el-merhûm es-Seyyid Hafız Emrullah Efendi hazretleri kıbel-i bâhirü’ş-şereflerinden husûs-ı meymenet-mahsûs-ı câ’i’z-zikrde vekîl-i sâbitü’l-vekâleleri hâcegân-ı Dîvân-ı hümâyûn’dan es-Seyyid Osman Ferid Efendi b. es-Seyyid Osman meclis-i şer‘-i şerîf-i Ahmedî ve mahfil-i dîn ü münîf-i Muhammedî’de zikri âtî vakfına li-ecli’t-tescîl ve’l-emru itmâmü’t-tekmîl mütevellî nasb u ta‘yîn olunan küttâbdan Ahmed Hamid Efendi b. Mustafa Naim Efendi mahzarında bi’l-vekâle ikrâr-ı sahîh-i şer‘î ve i‘tirâf-ı sarîh-i mer‘î edip işbu sene-i mübâreke Şa‘bânü’l-mu‘azzamı’nın yirmi dokuzuncu günü târîhiyle müverraha hâlâ nezâreti hazret-i Şeyhülislâm sellemehü’s-selâmîde âsûde Evkāf Müfettişi mevâlî-i i‘zâmdan Kütahyavîzâde fazîletlü es-Seyyid Mehmed Ârif Efendi’nin imzâsıyla mümzât ve hatemiyle mahtûme bir kıt‘a istibdâl hücceti nâtık olduğu vechile müvekkilim müşârün-ileyh hazretlerinin silk-i mülk-i sahîhlerinde münselik emlâklerinden olup mahmiye-i İslambol’da Eğrikapı dâhilinde Çukur ta‘bîr olunur nâm mahâlde ashâb-ı güzînden Abdullah el-Hudrî-radiyallâhu anhu- hazretlerinin türbe-i şerîfleri ittisâlinde kâin bir tarafdan türbe-i şerîf-i mezkûr ve bir tarafdan cidâr-ı hisâra tâbi‘ seğirdim mahâlli ta‘bîr olunur mukāta‘alı arsa ve bir tarafdan Sıvacı Dimitri zimmî menzili ve bahçesi ve taraf-ı râbi‘i tarîk-i hâs ile mahdûd tûlen ve arzen bi-hesâbı terbî‘î altı yüz altmış beş zirâ‘ arsa üzerine mebnî büyût-ı adîde ve bi’r-i mâ ve müştemilât-ı sâire-i ma‘lûmeyi hâvî bir bâb mülk menzilini ve atyeb-i menâllerinden imtiyâz olunan beş yüz guruşunu hasbeten-li’llâhi’l-ehad ve taleben li-merzâti’s-Samed vakf-ı sahîh-i mü’ebbed ve habs-i sarîh-i muhalled ile bi’l-vekâle vakf u habs edip şöyle şart eyledim ki menzil-i mezkûrun süknâsı türbe-i şerîf-i mezkûrda türbedâr olan kimesneye meşrûta olup ve meblağ-ı mezkûr beş yüz guruş rehn-i kavî ve kefîl-i melî ve lede’l-hâce ikisinden biri ile onu on bir buçuk guruş hesâbı üzere alâ-vechi’l-helâl irbâh ve istirbâh olunup hâsıl olan nemâsı zikr olunan menzilin iktizâsı vechile ta‘mîr ve termîmine harc ü sarf oluna ve vakf-ı mezkûrun tevliyeti müvekkilim müşârün-ileyh hazretleri lâbis-i libâs-ı hayat oldukça kendilerine meşrûta olup ba‘dehu evlâd-ı evlâd-ı kirâmlarının ekber ve aslah ve erşedi mütevellî ola ve ba‘dehum re’y-i hâkimle evlâd-ı evlâd-ı evlâd-ı utekāmdan ve ba‘dehum ecânibden dahi erbâbı olan kimesneye meşrûta ola ve eğer şurût-ı mezkûreye ri‘âyet müte‘azzir olur ise galle-i mezkûre Medîne-i münevvere -nevverehallâhu te‘âlâ ilâ-âhiri’l-kıyâm- fukarâsına meşrûta ola ve vakf-ı mezkûrun tebdîl ü tağyîri ve taklîl ü teksîri merreten ba‘de uhrâ müvekkilim müşârün-ileyhin yed-i devletlerinde ola deyü ta‘yîn-i şurût ve tebyîn-i kuyûd birle menzil ve nakd-i mezkûrları fâriğan ani’ş-şevâgil mütevellî-i merkūm Ahmed Hamid Efendi’ye bi’l-vekâle teslîm eylediğimde ol dahi ber-minvâl-i muharrer ahz ü teslîm ve evkāf-ı sâire mütevellîleri misillü bi’t-tevliye tasarruf eyledi dedikde gıbbe’t-tasdîki’ş-şer‘î emr-i vakf nihâyet ve hâl teslîm-i selâmet bulmuşiken vekîl-i mûmâ-ileyh es-Seyyid Osman Ferid Efendi akār ve nükūd vakıflarının adem-i lüzûm ve cevâzına zâhib olan eimme-i kirâm -aleyhimü’r-rahmetullâhi meliki’l-allâm- hazerâtının kavl-i şerîfleri üzere vakfeyn-i mezkûreynden bi’l-vekâle rücû‘ ve nizâ‘a şurû‘ ve mütevellî-i reşid dahi cevâb-ı sedîde âvaz edip vakfeyn-i mezkûreynin sıhhat ve lüzûmunu tecvîz eyleyen meşâyih-i zevi’l-ihtirâm hazerâtının akvâl-i şerîfe üzere kemâ-hüve’l-mastûr fi’l-kütübi’l-fıkhiyye bâlâ-yı kitâbı tevkī-i refî‘î ile tavşîh buyuran hâkim-i hâsim-i ma‘delet-nisâb -mâ-zâle hükmühü câriyen bi’s-savâb- efendi hazretleri huzûrunda müterafi‘ân ve her biri muktezâsınca fasl ve hasma tâlibân olduklarında hâkim-i mûmâ-ileyh -esbağallâhu ni‘amehu aleyh- hazretleri dahi vakfeyn-i mezkûreynin sıhhat ve lüzûmuna alâ-kavli men-yerâhu mine’l-eimmeti’l-müctehidîn hükm-i sahîh-i şer‘î ve kazâ-i sarîh-i mer‘î etmeğin ol vechile vakfeyn-i mezkûreyn sahîh ve lâzım ve habs-i sarîh ve mütehattim olup min-ba‘d nakz ve nakīzına mecâl muhâl oldu “fe-men-beddelehû ba‘de mâ-semi‘ahû fe-innemâ ismühû ale’l-lezîne yübeddilûnehu innallâhe semî‘un alîm” ve ecrü’l-vakfi ale’l-hayyi’l-cevâdi’l-kerîm cerâ zâlik ve hurrire kezâlik. Fi’l-yevmi’s-sâbi‘ min-Şevvâli’l-mükerrem li-sene sitte ve erba‘în ve mi’eteyn ve elf. Min-hicreti men-lehü’l-izzü ve’ş-şeref. Şuhûdü’l-hâl: Hasan Hüseyin Efendi b. Ali, Eşrâf-ı kuzâtdan Ahmed Abdülgani Efendi, Türbedâr Abdülhalim Efendi b. Mehmed Emin, Hafız İbrahim Edhem Efendi b. Hasan, Hafız İsmail Efendi b. Mustafa, Ali Ağa b. el-Hâc Mehmed, Hüseyin Ağa b. Yusuf ve gayruhum.