İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 72 Hüküm no: 25 Orijinal metin no: [5a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yamandi’nin uhdesinde bulunan bakkal gediği hisselerinden bir kısmını Yani v. Kostandi’ye sattığı Yedikule’de bakkāl Âsitâne-i seniyye’de vâki‘ bakkāl tâifesinden Dimitri v. Yamandi nâm zimmî meclis-i şer‘-i hatîrde yine tâife-i mersûmeden işbu hâmilü’r-rakīm Yani v. Kostandi nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikule dâhilinde Hacıevhad mahallesinde kâin Osman Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi işbu hâzır bi’l-meclis Bakkāl Kostandi zimmînin ve mâ‘adâ doksan sehmi akd-i âti’z-zikrin sudûruna değin benim bâ-hüccet yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum doksan sehm hissemin altmış sehmini yedimde ibkā ve mâ‘adâ otuz sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîkim hâzır-ı mersûmun izn ü icâzetiyle mersûm Yani zimmîye dört yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl ve semen-i mezkûr dört yüz guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d otuz sehmde benim kat‘â alâka ve medhalim kalmayıp müşteri-i mersûm Yani zimmînin mülk-i müşterâsı ve hakk-ı sırfı olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 6 Ramazan sene 1246 Şuhûdü’l-hâl: Eş-şâhidûnü’s-sâbikūn