İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 72 Hüküm no: 26 Orijinal metin no: [5a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Kostandi’nin uhdesindeki bakkal gediği hisselerinden bir kısmını oğluna sattığı Yedikule’de bakkāl Tetimme-i bakkāl Âsitâne-i aliyye’de vâki‘ bakkāl tâifesinden Kostandi v. Lefter nâm zimmî meclis-i şer‘-i hatîrde tâife-i mersûmeden sulbî kebîr oğlu işbu bâ‘isü’s-sifr Yuvan nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Yedikulekapısı dâhilinde vâki‘ Tavukçuoğlu dükkânı denmekle meşhûr bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla kırk sehmi Angeli zimmînin ve elli sehmi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla gedik-i mezkûrdan ben ber-minvâl-i muharrer mâlik olduğum elli sehm hisse<> -i şâyi‘amın yirmi sehmini yedimde ibkā ve mâ‘adâ otuz sehmini tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve şerîklerim izinleriyle oğlum mersûm Yuvan zimmîye [5b] beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semeni olan meblağ-ı mezkûr beş yüz guruşu oğlum mersûm bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d hisse-i mezkûrede benim aslâ ve kat‘â alâka ve medhalim kalmayıp oğlum müşteri-i mersûm Yuvan zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 6 N sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi, Kethüdâ-i muhzırân İsmail Ağa Ustabaşı Ligori, Ustabaşı İsak, Yazıcı Filibos, Kabzımâl Dimitri