İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 74 Hüküm no: 28 Orijinal metin no: [5b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ümmügülsüm Hanım’ın uhdesindeki berber dükkânı gediğini Taşçıbaşı Agop ve eşine sattığı Berber Mahmiye-i İstanbul’da Fethiye kurbünde Kâtib Muslihiddin mahallesinde sâkine ve zâtı ta‘rîf-i şer‘î ile mu‘arrefe olan Kebîrîzâde zevcesi Şerife Ümmügülsüm Hanım bt. Emrullah meclis-i şer‘-i şerîf-i enverde işbu hâmiliyyü’r-rakīm Saray-ı Cedîd-i Sultânî’de Taşçıbaşı Agop v. Parsih zimmî ile zevcesi şahsı mu‘arrefe Limonya Nasrâniyeden mersûme Limonya Nasrâniyenin babası ve taraflarından husûs-ı âti’l-beyânda tasdîka vekîl-i şer‘îleri Çubukçu Kasper v. Melkon nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Zincirlikuyu kurbünde kâin bir bâb berber dükkânından müstahlas Başmuhâsebe Kalemi’nde Esad Usta ismine mukayyed ve mu‘teber beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakılleten mülküm olmağla ben ber-minvâl-i muharrer mâlike olduğum gedik-i mezkûru tarafeynden îcâb ve kabûlü <> hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcân-ı müvekkilân-ı mesfûrâna bin üç yüz guruşa ale’l-iştirâk bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl edip semen-i mezkûr bin üç yüz guruşu bana tamâmen def‘ ü teslîm ve ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ-i âmm-ı sahîh-i şer‘î ile ibrâ ve iskāt eyledik ba‘de’l-yevm gedik-i mezkûrda benim aslâ ve kat‘â alâka ve medhalim kalmayıp müşteriyân-ı zevcân-ı müvekkilân-ı mesfûranın mülk-i müşterâları ve hakk-ı sırfları olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 14 Şevvâl sene [12]46 Şuhûdü’l-hâl: Kethüdâvekîli el-Hâc İbrahim Ağa, Şeyh Mustafa Efendi, Du‘âcı İsmail Efendi, Yiğitbaşı el-Hâc Mehmed Ağa, Çavuş Abdurrahman Ağa ve gayruhum.