İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 73 Hüküm no: 27 Orijinal metin no: [5b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Enserci esnafı kethüdalığına Agop’un tayin olunduğu Kethüdâ nasbı Âsitâne-i aliyye’de vâki‘ enserci esnâfının kâhyası olan Simyon v. Parsih zimmî bu def‘a rızâsıyla kâhyalık-ı mezkûrdan keff-i yed eylediğine binâen esnâf-ı merkūmeden Çatladıkapılı Agop v. Karabet zimmî örf ve âdetlerine vâkıf ve şurût ve nizâmlarını ârif ve her vechile umûr-ı kâhyalığı idâreye muktedir olduğunu esnâf-ı mersûmeden Ohannes v. Markos ve Karabet v. Mankasar ve Agop v. Kirkor ve Hazerya v. Manuk ve Toros v. Parsih nâm zimmîler ihbâr ederek kâhya nasb u ta‘yîn olunmasını istirhâm ve istid‘â etmeleriyle hâkim-i hâsim vâlâ cenâb -veffakallâhu te‘âlâ bi’s-sıdk-ı ve’s-savâb- efendi hazretleri dahi mersûm Agop zimmîyi esnâf-ı merkūme üzerine kâhya nasb u ta‘yîn ve umûr-ı kâhyalığı kadîmden ola geldiği vech üzere idâre ve rü’yete ve esnâf-ı mezkûreden bir ferde hilâf-ı şer‘-i şerîf ve mugāyir-i kānûn-ı münîf rencîde etmemeğe emr ü tenbîh buyurduklarında ol dahi kabûl ve ber-mûceb-i emr ü tenbîh amel ve harekete ta‘ahhüd etmeğin mâ-hüve’l-vâki‘ bi’l-ibtigā sebt ü imlâ olundu. Fî 12 Şevvâl sene 1246 Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi, Muhzır İbrahim Çelebi.