İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 75 Hüküm no: 30 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Ayşe Hanım’ın boşandığı kocası Debbağ Ahmed ile zimmet ibrası yaptığı Tatlîk Mahmiye-i İstanbul hısnı ebvâbından Edirnekapısı dâhilinde Ka‘riye Ali Paşa mahallesinde sâkine ve zâtı zeyl-i vesîkada muharrerü’l-esâmî Müslimîn ta‘rîfleriyle mu‘arrefe <> Şerife Âişe bt. Mustafa nâm hatun meclis-i şer‘-i münîrde zevc-i mutallıkı işbu bâ‘isü’l-kitâb Debbâğ es-Seyyid Ahmed Ağa b. el-Hâc mahzarında ikrâr-ı tâm ve takrîr-i kelâm edip merkūm es-Seyyid Ahmed Ağa zevc-i dâhilim olup işbu târîh-i kitâb günü beni bir talâk-ı bâyin ile tatlîk etmekle zimmetinde mütekarrir ve ma‘kūdün-aleyh olan iki yüz bir guruş mehr-i müeccelim ile nafaka-i iddet-i mu‘ayyene-i ma‘lûmem mukābelesinde beynimizde bi’t-terâzî takdîr olunan yüz elli guruş ve mehr-i mu‘accel mukāvele olunan eşyâ-i ma‘lûme ve beynimizde ma‘lûm bir elmas yüzük bahâlarından dört yüz doksan dört guruş ki min-haysü’l-mecmû‘ sekiz yüz guruşu zevcim mutallıkım [zevc-i mutallıkım] merkūm es-Seyyid Ahmed Ağa işbu meclis-i şer‘de bana tamâmen def‘ ü teslîm ve ben dahi yedinden bi’t-tamâm ve’l-kemâl ahz u kabz etmemle bi’l-cümle husûs-ı mezkûra ve hukūk-ı zevciyyete ve ibtidâ-i zevciyyetden işbu târîh-i vesîkaya gelince sâir cemî‘ hukūk-ı şer‘iyeye müte‘allika âmme-i de‘âvî ve kâffe-i mutâlebâtdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 17 Şevvâl sene [1]246 Şuhûdü’l-hâl: Hüseyin Çelebi b. Yusuf, Hafız İsmail Efendi b. Mustafa, Ali Ağa b. el-Hâc Mehmed, el-Hâc Ahmed Ağa b. Osman ve gayruhum.