İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 76 Hüküm no: 31 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa’nın uhdesindeki bakkal dükkânı gediğini Memiş Ağa ile Dimitri ve Angeli zimmilere sattığı Yağcı bakkāl İhrâc-şüd Fî 25 [Zilhicce?] sene [12]53 Mahmiye-i İstanbul’da Müftî Ali mahallesinde sâkin Balkapanı tüccârından es-Seyyid el-Hâc Ahmed Ağa b. es-Seyyid Mehmed meclis-i şer‘-i münîrde yağcı bakkāl esnâfından işbu bâ‘isü’l-vesîka es-Seyyid Mehmed Memiş Ağa b. Ömer nâm kimesne ile Dimitri v. Praşkova ve Angeli v. Atam nâm zimmîler muvâcehelerinde ikrâr-ı tâm ve takrîr-i kelâm edip mahmiye-i mezbûre hısnı ebvâbından Odunkapısı dâhilinde Kutucular Sûku başında kâin Mehmed Efendi dükkânı denmekle arîf bir bâb yağcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin bâ-hüccet-i şer‘iye yedimde müstakıllen mâlım ve mülküm olmağla ben ber-minvâl-i muharrer mâlik olduğum gedik-i mezkûru tarafeynden îcâb ve kabûlü hâvî şurût-ı müfside ve uhûd-ı mubtıla ve muvâza‘adan ârî bey‘-i bâtt-ı sahîh-i şer‘î ve safka-i vâhide ile mezbûr es-Seyyid Mehmed Memiş Ağa ile mersûmân Dimitri ve Angeli zimmîlerden her birine islâsen ale’l-iştirâki’s-seviyy on altı bin guruşa bey‘ ü temlîk ve teslîm eylediğimde onlar dahi ber-minvâl-i muharrer iştirâken iştirâ ve temellük ve tesellüm ve kabz ve kabûl eylediklerinden sonra semeni olan meblağ-ı mezkûr on altı bin guruşu mezbûr es-Seyyid Mehmed Memiş Ağa ile mersûmân Dimitri ve Angeli zimmîler bana tamâmen def‘ ü teslîm ben dahi yedlerinden bi’t-tamâm ve’l-kemâl ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik fî-mâ ba‘d gedik-i mezkûrda benim aslâ ve kat‘â alâka ve medhalim kalmayıp müşteriyyûn-ı mezbûr es-Seyyid Mehmed Memiş Ağa ile mesfûrân Dimitri ve Angeli zimmîlerin islâsen mülk-i müşterâları ve hakk-ı sırfları olmuşdur dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 17 Şevvâl sene 1246 Şuhûdü’l-hâl: Kapan-ı Asel Nâzırı es-Seyyid el-Hâc Feyzullah Ağa b. Ali, Yağcı Küçük el-Hâc Ömer Ağa, Pazarbaşı Süleyman Ağa, Bölükbaşı Abdi Çelebi, Odacı Hüseyin Çelebi Ustabaşı Zaharya v. Yani, Ustabaşı Dimitri v. Panayot, Ustabaşı Kostandi v. Ananosti