İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 108 Hüküm no: 69 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Simitçi Kaytan’dan çocuklarına miras kalan gedik hisselerinin tescil olunması Kapalı fırında simitçi ihbârı Vilâyet-i Rumeli’de Debre kasabasında mütemekkin iken bundan akdem hâlik olan Simitçi Kaytan v. Görge nâm zimmînin hasran vârisleri sulbî kebîr oğulları Mercan ve İstiro ve Boşko nâm zimmîlerden kendi nefsinden asıl ve li-ebeveyn er karındaşları mersûmân Mercan ve İstiro zimmîler taraflarından husûs-ı âti’l-beyânda vekîl-i sâbitü’l-vekâleleri işbu bâ‘isü’s-sifr mersûm Boşko zimmî meclis-i şer‘-i hatîrde bi’l-asâle ve bi’l-vekâle takrîr-i kelâm ve bast ani’l-merâm edip mahmiye-i İstanbul’da Nuruosmaniye Câmi‘-i şerîfi kurbünde Cezerî Kasımpaşa mahallesinde kâin kapalı fırın denmekle ma‘rûf bir bâb simitçi fırını derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin [yüz] yirmi sehm i‘tibârıyla altmış sehmi işbu hâzır bi’l-meclis Hıristo v. İlya zimmînin ve otuz sehmi Bülbül ve Miloş ve Lulu evlâd-ı Kiço zimmîlerin ve otuz sehmi dahi babamız hâlik-i mersûmun sağlığında ile’l-helâk yedinde mülkü olup ba‘de helâkihi benimle karındaşlarım ve müvekkillerim mersûmâna islâsen mevrûs olmağla husûs-ı mezkûr esnâfımızdan vukūf ve ıttılâ‘ları olan kimesnelerden istihbâr ve yedimize kıbel-i şer‘den bir kıt‘a hüccet i‘tâsı bi’l-verâse ve bi’l-vekâle murâdımdır dedikde esnâf-ı mezkûreden zeyl-i vesîkada muharrerü’l-esâmî Müslimîn nâm kimesnelerden lede’l-istihbâr gedik-i mezkûrun otuz sehm hissesi asıl ve vekîl-i mersûmun babası hâlik-i mersûm Kaytan zimmînin sağlığında ile’l-helâk yedinde mülkü olduğunu alâ-tarîkı’ş-şehâde ihbâr etmeleriyle alâ-mûcib-i ihbârihim hıfzan-li’l-makāl işbu vesîka-i enîka bi’t-taleb ketb olundu. Fî 26 Şevvâl sene 1246 Şuhûdü’l-hâl: Simitçi İsmail Ağa, Yiğitbaşı Molla İsmail. Şehzâdebaşında Yuvan, esnâfdan Şara.