İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 107 Hüküm no: 68 Orijinal metin no: [13a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa’nın uhdesindeki gedik hisselerini Ligori v. İstavri’ye sattığı Bakkāl Zikri âtî bir bâb bakkāl gediğinin yüz yirmi sehm i‘tibârıyla doksan sehmine mâlik olan iplikçi esnâfından Ahmed Ağa b. Abdullah meclis-i şer‘-i şerîfde bakkāl tâifesinden işbu bâ‘isü’s-sifr Ligori v. Kiryako nâm zimmî muvâcehesinde ikrâr-ı tâm ve takrîr-i kelâm edip mahmiye-i İstanbul hısnı ebvâbından Odunkapısı hâricinde Yumurtacılar sûkunda vâki‘ Kuruyemişçi el-Hâc Ahmed Ağa ve Dimitri zimmî dükkânları beynlerinde kâin bir bâb peynirci bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibârıyla otuz sehmi Kiryako zimmînin ve bâkī doksan sehmi dahi akd-i âti’z-zikrin sudûruna değin benim bâ-hüccet-i şer‘iye yedimizde mülkümüz olmağla ben ber-minvâl-i muharrer mâlik olduğum doksan sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve müşterekim mersûmun izniyle mersûm Ligori zimmîye beş bin beş yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i meşrûh iştirâ ve temellük ve tesellüm ve kabz ve kabûl edip semen-i mezkûr [13b] beş bin beş yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik fî-mâ ba‘d gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteri-i mersûm Ligori zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 23 L sene 1246 Şuhûdü’l-hâl: Eş-şâhidûnü’s-sâbikūn.