Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 410 Hüküm no: 481 Orijinal metin no: [78a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstemat v. Zaharya’nın terekesinin paylaşılması hususunda vârislerin anlaştıkları Havâss-ı Aliyye kazâsına tâbi‘ Karka nâm karye sükkânından iken bundan akdem hâlik olan İstemat v. Zahar[ya] nâm zimmînin verâseti zevce-i metrûkesi Sultana bt. Todori nâm nasrâniye ile sulbî kebîr oğlu Dimitri’ye ve sulbiye kebîre kızı Maryora nâm nasrâniye münhasır oldukdan sonra mezbûr Dimitri meclis-i şer‘-i şerîf-i enverde işbu râfi‘ü’l-vesîka merkūm Maryora ve zevci Yamandi v. Yani muvâcehesinde ikrâr ve takrîr-i kelâm edip mezbûre Maryora Papa İstemad’ın terekesinden olup karye-i mezbûrda vâki‘ bir tarafdan Karakaş ve bir tarafdan Mariş ve bir tarafdan Manol ve bir tarafdan Dimi mülkleri ile mahdûd ve fevkānî iki oda ve tahtânî iki ve bir tarafdan Sahak tarlası ve bir tarafdan tarîk-i âm ile mahdûd mukaddemâ iki kıt‘a olup hâlâ bir kıt‘a olan mülk bağa merkūm Yamandi bi gayri hakkın vaz‘-ı yed eder deyû zikr olunan menzil ve bağdan hisse-i şer‘iyyemi merkūm Yamandi’den taleb ve da‘vâ eylediğimde mezbûr Maryora’ya meblağ-ı mezbûru bi’l-külliye inkâr edip ve mezbûr Yamandi cevâbında hâlik-i mezbûrun terekesini beynlerinde iktisâm eylediklerinde menzil-i merkūm ile bağ-ı mezkûr zevc-i mezbûre Maryora’nın hissesine bi’t-terâzî ta‘yîn ve tahsîs olup mezbûr Yamandi zikr olunan menzil ve bağı semen-i ma‘lûma bana bey‘ ve teslîm edip ol vechile mülk-i müşterâm olmuşdur demekle beynimizde münâza‘ât-ı kesîre cereyânından sonra beynimizde muslihûn tavassut edip meblağ-ı mezbûr da‘vâsından merkūm Maryora ile beni yirmi beş guruş yedinden ahz u kabz edip ben meblağ-ı mezbûr da‘vâsından merkūm Maryora ile beni yirmi beş guruş üzerine sulh eylediklerinde ben dahi sulh-i mezbûru kabûl bedel-i sulh olan meblağ-ı mezbûr yirmi beş guruşu yedinden ahz u kabz edip ben meblağ-ı mezbûrdan ve tereke-i hâlik-i merkūmdan bana isâbet eden hisse-i şer‘iyyeye müte‘allika âmme-i da‘vâ- [78b] dan merkūm Yamandi’nin zimmetini ibrâ-i âmm-ı kātı‘ü’n-nizâ‘la ibrâ ve iskāt edip mezbûre Maryora dahi bedel-i sulh-i mezbûra ve babası hâlik-i mezbûrun terekesinden hisse-i şer‘iyyesine müte‘allika da‘vâdan merkūm Yamandi dahi benden cihet-i karzdan müdde‘âsı olan doksan guruşa müte‘allika âmme-i da‘vâdan benim zimmetimi ibrâ ve iskāt eyledikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Mustafa b. Tevekkül, İbrahim b. Ahmed, Mehmed b. İdris, Ali b. Bâli, Receb b. Osman.