Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 411 Hüküm no: 482 Orijinal metin no: [78b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Seydi Yusuf’un evini Hacı Şeyhi b. Hacı Hasan’a sattığı Fi’l-asl vilâyet-i Anadolu’da medîne-i İzmir mahallâtından Kefeli mahallesi ahâlîsinden olup mahrûse-i Üsküdar’da müsâferet vechi üzre sâkin olan Mehmed Çelebi b. Seydî Yusuf nâm kimesne meclis-i şer‘-i şerîfde medîne-i Tire ahâlîsinden bâ‘isü hâze’l-kitâb el-Hâc Şeyhî b. el-Hâc Hasan nâm kimesne mahzarında ikrâr-ı tâm ve takrîr-i kelâm edip akd-i âti’z-zikr sudûruna değin yedimde mülk ve hakkım olup zikr olunan Kefeli mahallesinde vâki‘ iki tarafdan kendi mülküm ve iki tarafdan tarîk-i âm ile mahdûd dört bâb fevkānî oda ve altı bâb tahtânî odayı ve kenîfi müştemil menzilimi bi cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i kat‘î ile mezbûr el-Hâc Şeyhî’ye beş yüz yirmi beş esedî guruşa bey‘ ve temlîk ve teslîm ol dahi ber vech-i muharrer iştirâ ve temellük eylediğinden sonra semeni olan meblağ-ı mezbûr beş yüz yirmi beş guruşu mezbûr el-Hâc Şeyhî bana edâ ve teslîm ben dahi yedinden bi’t-tamâm ve’l-kemâl kabz ve tesellüm eylediğimden sonra menzil-i mahdûd-ı mezbûru mahallinde kabz ve tasarrufa mezbûr el-Hâc Şeyhî’yi taslît eyledim ba‘de’l-yevm menzil-i mahdûd-ı merkūm mezbûr el-Hâc Şeyhî’nin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Du‘âcı Ahmed b. Abdullah, Mustafa Efendi el-Müderris, İbrahim Efendi b. Seyyid Ömer, Hacı Mustafa b. Abdi, es-Seyyid el-Hâc Ahmed b. es-Seyyid Mustafa, İbrahim Hoca b. el-Hâc Hüsam ve gayruhüm mine’l-hâzırûn.