İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 110 Hüküm no: 72 Orijinal metin no: [14a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Çakıroğlu Aci Yorgi’nin uhdesindeki gedik hisselerini Mina v. Nikola’ya sattığı Bakkāl Âsitâne-i aliyye’de vâki‘ bakkāl tâifesinden Çakıroğlu Aci Yorgi v. İstavri nâm zimmî meclis-i şer‘-i hatîrde tâife-i mersûmeden işbu hâmilü’r-rakīm Mina v. Nikola nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Haseki kurbünde kâin Ramazan Ağa dükkânı denmekle arîf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme yüz yirmi sehm i‘tibârıyla yirmi sekiz sehmi Sava zimmînin ve otuz bir sehmi Toma zimmînin ve otuz üç sehmi âharın ve mâ‘adâ yirmi sekiz sehmi akd-i âti’z-zikrin sudûruna değin benim bâ-hüccet-i şer‘iye yedimde mülkümüz olmağla gedik-i mezkûrdan ben ber-minvâl-i muharrer mâlik olduğum yirmi sekiz sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ve bâ-izn-i şürekâ mersûm Mina zimmîye bin dört yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr bin dört yüz guruşu bana tamâmen def‘ ü teslîm ve ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm gedik-i mezkûrun hisse-i şâyi‘asında benim aslâ ve kat‘â alâka ve medhalim kalmayıp müşteri-i mersûm Mina zimmînin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şevvâl sene 1246 Şuhûdü’l-hâl: Pazarbaşı Süleyman Ağa, Bölükbaşı Abdi Çelebi. Ustabaşı Kiryako, Ustabaşı Nikola, Ustabaşı İsak, Yazıcı Filibos