İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 112 Hüküm no: 75 Orijinal metin no: [14b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı Mustafa Ağa’nın uhdesindeki gedik hisselerini Hüseyin Ağa’ya sattığı Helvacı Mahmiye-i İstanbul’da Fethiye kurbünde Kâtib Muslihiddin mahallesinde sâkin helvacı esnâfından Mustafa Ağa b. Mehmed meclis-i şer‘-i münîrde esnâf-ı mezkûreden işbu bâ‘isü’l-kitâb es-Seyyid Hüseyin Ağa b. Hüseyin mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin bâ-hüccet-i şer‘iye yedimde müstakıllen mülküm olup mahmiye-i mezbûrede Balat Mahkemesi altında kâin bir bâb helvacı dükkânı derûnunda mevcûde beyne’l-esnâf gedik ta‘bîr olunur beş kazgan ve dört tepsi ve bir mermer ve bir terâzî ma‘a derâhim ve bir çekmece ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Hüseyin Ağa’ya üç bin guruşa bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr üç bin guruşu bana tamâmen def‘ ü teslîm ben dahi yedinden ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt eyledik ba‘de’l-yevm âlât-ı muharrere-i mezkûrede benim aslâ ve kat‘â alâka ve medhalim kalmayıp müşteri-i merkūm es-Seyyid Hüseyin Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 27 Şevvâl sene [1]246 Şuhûdü’l-hâl: Kethüdâ Receb Ağa, Sâbık Kethüdâ es-Seyyid Ali Ağa, Yiğitbaşı Mehmed Ağa, Alacahamam’da Halil Ağa, Odunkapılı Ahmed Ağa.