İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 113 Hüküm no: 76 Orijinal metin no: [14b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Sıdıka Hanım’ın uhdesindeki yağlıkçı gediği hisselerini Osman’a sattığı Yağlıkçı Mahmiye-i İstanbul hısnı ebvâbından Mevlevîhâne Kapısı dâhilinde Evliya Câmi‘-i şerîfi mahallesi ahâlîsinden olup hâlâ Kumla kasabasında sâkine Âişe Sıdıka bt. Mustafa b. Abdullah nâm hatunun vâlidesi ve tarafından husûs-ı âti’l-beyânda vekîl olduğu zâtlarını ârifân Yağlıkçı es-Seyyid Mehmed Ağa b. Ahmed ve Yağlıkçı es-Seyyid Mustafa Ağa b. es-Seyyid Mehmed nâm kimesneler şehâdetleriyle sâbit olan Tevhide Hatun bt. Mustafa meclis-i şer‘-i şerîf-i enverde Yağlıkçı esnâfından işbu bâ‘isü’l-vesîka es-Seyyid Hafız Osman Efendi b. es-Seyyid Ömer mahzarında bi’l-vekâle ikrâr-ı tâm ve takrîr-i kelâm edip mahmiye-i mezbûrede Yağlıkçılar sûkunda Orta sokakda Yağlıkçı Ebubekir Ağa ve İbrahim Ağa dükkânları beyninde kâin bir bâb yağlıkçı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûme akd-i âti’z-zikrin sudûruna değin kızım ve müvekkilem mezbûrenin bâ-hüccet-i şer‘iye yedinde müstakılleten mülkü olmağla kızım ve müvekkilem mezbûrenin ber-minvâl-i muharrer mâlike olduğu gedik-i mezkûru tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid Hafız Osman Efendi’ye beş yüz guruşa bi’l-vekâle bey‘ ü temlîk ve teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl edip semen-i mezkûr beş yüz guruşu bana tamâmen def‘ ü teslîm ben dahi yedinden bi’l-vekâle ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî bi’l-asâle ve bi’l-vekâle ibrâ ve iskāt eyledik ba‘de’l-yevm gedik-i mezkûrda kızım ve müvekkilem mezbûrenin aslâ ve kat‘â alâka ve medhali kalmayıp müşteri-i merkūm es-Seyyid Hafız Osman Efendi’nin mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 11 Za sene 1246 Şuhûdü’l-hâl: Kethüdâ el-Hâc Veliyyüddin Ağa, el-Hâc İbrahim Ağa b. İbrahim, Hafız el-Hâc Mehmed Efendi b. Ahmed, Yiğitbaşı Osman Efendi.