İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 117 Hüküm no: 81 Orijinal metin no: [15b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uhdesindeki değirmen gediklerini rehin göstererek borçlanan Ali Ağa’nın borçlarını ödediği Fekk-i rehn-i fırın-ı ekmekçi Asıl hüccet târîhi Fî 10 Ra sene [1]238 İşbu sebt-i hâmiş olunan hüccetde mezkûrü’l-ism Hatibzâde es-Seyyid el-Hâc Hasan Ağa b. Ali’nin sulbî kebîr oğlu ve tarafından husûs-ı âti’l-beyânda ikrâr ve takrîre vekîl olduğu es-Seyyid Mehmed İzzet Efendi b. Mustafa ve Ali Ağa b. Ömer şehâdetleriyle sâbit olan Ali Şahin Ağa meclis-i şer‘-i şerîf-i enverde kezâlik derûn-ı hüccetde ismi mezkûr Sadık Ağazâde Ali Ağa b. Mehmed Sadık mahzarında bi’l-vekâle ikrâr-ı tâm ve takrîr-i kelâm edip babam ve müvekkilim merkūm ber-mantûk-ı hüccet benim merkūm Ali Ağa zimmetinde cihet-i karzdan alacağım olan altı bin beş yüz elli guruşu merkūm Ali Ağa bana tamâmen def‘ ü teslîm ben dahi yedinden ahz u kabz etmemle deyn-i mezkûr mukābelesinde ber-mûceb-i hüccet yedimde deyn-i mezkûr takdîmiyle rehin olan iki bâb değirmen gediklerinden on iki re’s bârgir ve onlara isâbet eden sâir âlât-ı lâzıme-i ma‘lûmeyi rehniyetden ba‘de’l-fekk merkūm Ali Ağa’ya teslîm edip fî-mâ ba‘d alacağımdan merkūmun yed ü zimmetinde bir akçe ve bir habbe hakkım ve hisse-i gedik-i mezkûrlarda dahi kat‘â alâka ve medhalim kalmayıp ke’l-evvel merkūm Ali Ağa’nın mülk-i mahzıdır dedi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî 17 Za sene 1246 Şuhûdü’l-hâl: Kethüdâ-i muhzırân İsmail Ağa, Odacı Hüseyin Çelebi, Çörekçi Ahmed Usta.