İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 116 Hüküm no: 80 Orijinal metin no: [15a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha Hatun’un uhdesindeki gedik hisselerinden bir kısmını Mehmed Besim’e sattığı Berber Mahmiye-i İstanbul’da Cibâli Kapısı dâhilinde Aşıkpaşa mahallesinde sâkine Saliha bt. Osman nâm hatun tarafından zikri âtî husûsu ikrâr ve i‘tâ-i hüccete vekîl olduğu zât-ı mezbûreyi bi’l-mu‘arrefetü’ş-şer‘iye ârifân düğmeci esnâfından Mehmed Salih Ağa b. Mehmed ve es-Seyyid Mustafa Ağa b. Ali nâm kimesneler şehâdetleriyle ber-nehc-i şer‘î sâbit olan Kapan-ı dakīk tüccârından es-Seyyid el-Hâc İbrahim Ağa b. Hüseyin nâm kimesne savb-ı şer‘-i enverden bi’l-iltimâs mezûnen irsâl olunan Kâtib Abdullah Kâmil Efendi’nin İstanbul hısnı ebvâbından Ayazma Kapısı hâricinde Kaygan İskelesi’nde leb-i deryâ karşısında bezci mağazasında zeyl-i vesîkada muharrerü’l-esâmî Müslimîn huzûrlarında akd <> eylediği meclis-i şer‘-i enverde müvekkile-i merkūme Saliha Hatun’un zevci Dîvân-ı âlî Kalemi küttâbından işbu bâ‘isü’l-kitâb es-Seyyid Mehmed Besim Efendi b. es-Seyyid Osman mahzarında bi’l-vekâle ikrâr-ı tâm ve takrîr-i kelâm edip müvekkilem merkūme Saliha Hatun mahmiye-i mezbûrede Şehremini kurbünde camcı karşısında Başmuhâsebe’de <> Berber İbrahim Usta ismine mukayyed ve mu‘teber âhar akāra tebdîl olunan bir bâb berber dükkânı derûnundan müstahlas beyne’l-esnâf gedik ta‘bîr olunur akd-i âti’z-zikrin sudûruna değin müstakıllen yedimde emvâlim olan bâ-defter-i müfredât âlât-ı lâzıme-i ma‘lûmenin nısf hisse-i şâyi‘asını yedimde ibkā ve nısf-ı şâyi‘-i âharını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcim mezbûr es-Seyyid Mehmed Besim Efendi’ye altı yüz guruşa bey‘ ü temlîk ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eylediğinden sonra [15b] semeni olan meblağ-ı mezkûr altı yüz guruşu bana def‘ ü teslîm ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm âlât-ı lâzıme-i müstahlasa-i mezkûrenin ancak nısf hisse-i şâyi‘asında benim kat‘â alâka ve medhalim kalmayıp zevcim merkūm es-Seyyid Mehmed Besim Efendi’nin emvâl-i müşterâtı ve hakk-ı sırfı olmuşdur dedi dedikde gıbbe’t-tasdîki’ş-şer‘î vâki‘ hâli kâtib-i mezbûr mahâllinde ketb ü tahrîr ve ma‘an meb‘ûs ümenâ-i şer‘den Çukadâr el-Hâc Salih Ağa b. Mehmed ve Muhzır Du‘âcı Molla Halil b. Abdullah ile meclis-i şer‘-i şerîfe gelip alâ-vukū‘ihî inhâ ve takrîr etmeğin mâ vaka‘a [bi’t-taleb ketb olundu] Fî 10 Za sene 1246 Şuhûdü’l-hâl: Kethüdâvekîli el-Hâc İbrahim Ağa ve Şeyhî Mustafa Efendi, Kâtib es-Seyyid el-Hâc Abdurrahman, Du‘âcı İsmail Efendi, Yiğitbaşı es-Seyyid el-Hâc Mehmed Nuri Ağa.