İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 118 Hüküm no: 83 Orijinal metin no: [15b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Zekiye Hanım’ın uhdesindeki gedik hisselerini Abdullah Ağa’ya sattığı Şekerci mübâya‘ası Kaydı ihrâc-şüd Fî 7 Zilhicce sene [12]84 Mahmiye-i İstanbul’da Şehremini kurbünde Deniz Abdal mahallesinde sâkine ve zâtı zeyl-i kitâbda muharrerü’l-esâmî müslimîn ta‘rîfleriyle mu‘arrefe Emine Zekiye Hanım bt. Hüseyin meclis-i şer‘-i enverde şekerci esnâfından işbu bâ‘isü’l-kitâb Abdullah Ağa b. Ömer nâm kimesne mahzarında ikrâr-ı tâm ve takrîr-i kelâm edip mahmiye-i mezbûrede ketenciler başında Alacahamam kurbünde Çelebioğlu Alaaddin mahallesinde kâin bir tarafdan ekmekçi fırını ve bir tarafdan na‘lcı dükkânı ve bir tarafdan kaymakçı dükkânı ve taraf-ı râbi‘i tarîk-i âm ile mahdûd bir bâb şekerci dükkânı derûnunda mevcûde Başmuhâsebe Kalemi’nde mukayyed ve mu‘teber beyne’l-esnâf gedik ta‘bîr olunur bâ-defter-i müfredât âlât-ı lâzıme-i ma‘lûmenin rub‘ hisse-i şâyi‘ası merkūm Abdullah Ağa’nın ve rub‘ hisse-i şâyi‘a-i âharı dâmâdı işbu hâzır bi’l-meclis Şekerci İbrahim Ağa’nın ve nısf hisse-i şâyi‘ası dahi akd-i âti’z-zikrin sudûruna değin benim yedimizde mülkümüz olmağla ben gedik-i mezkûrdan mâlike olduğum nısf hisse-i şâyi‘a-i mezkûremi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile merkūm Abdullah Ağa’ya dört bin iki yüz elli guruşa bâ-izn-i hâzır-ı merkūm bey‘ ü temlîk ve vech-i lâyıkı üzere teslîm eylediğimde ol dahi ber-minvâl-i muharrer iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezkûr dört bin iki yüz elli guruşu müşteri-i merkūm Abdullah Ağa bana tamâmen def‘ ü teslîm ve ben dahi yedinden tamâmen ve kâmilen ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik fî-mâ ba‘d gedik-i mezkûrda olan hissemde benim aslâ ve kat‘â alâka ve medhalim kalmayıp müşteri-i merkūm Abdullah Ağa’nın mülk-i müşterâsı ve hakk-ı sırfı olmuşdur dedikde gıbbe[‘t-tasdîki’ş-şer‘î mâ-vaka‘a bi’t-taleb ketb olundu] Fî 22 Za sene 1246 Şuhûdü’l-hâl: Kethüdâ-i muhzırân İsmail Ağa, Sultanmehmedli Ali Usta, Kethüdâ Hasan Ağa, Şekerci İsmail Ağa, el-Hâc Halil Ağa, Yiğitbaşı İbrahim Ağa.