İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 119 Hüküm no: 84 Orijinal metin no: [16a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Firar eden Affan Ağa’nın kilitli odasının açılarak eşyalarının tespit olunup kayyıma teslim edildiği Müderrisîn-i kirâm-ı zevi’l-ihtirâmdan olup bundan akdem irtihâl-i dâr-ı bekā eden Osman Molla Efendi necli’l-merhûmü’l-mebrûr kazasker-i esbak Abdullah Molla Efendi hazretleri mu‘takalarından İstanbul’da Ebulfeth Sultan Mehmed Han Câmi‘-i şerîfi kurbünde Şekercihanı derûnunda tabaka-i vüstâda sol tarafda vâki‘ Aynacı İsmail Efendi odasında [odasına] muttasıl bir bâb odada müşâhereten müstecir olan Affan Ağa b. Abdullah nâm kimesne on iki seneden beri oda-i merkūmeyi mukaffelen terk ve ta‘tîl birle diyâr-ı âhara gidip gaybet-i munkatı‘a ile gāib olup ol vechile mefkūd hükmüne girmiş olduğundan oda-i merkūme küşâd ve derûnunda bulunan gāib-i mezbûrun eşyâsı tahrîr ve yed-i emîne vaz‘ olunması iltimâs olunmağla kıbel-i şer‘den mezûnen irsâl olunan Kâtib es-Seyyid Hüseyin Rıza Efendi ma‘an meb‘ûs ümenâ-i şer‘den Çukadâr el-Hâc Salih Ağa b. Mehmed ve Muhzır Molla Mustafa b. Ali ile oda-i mezkûreye varıp tütüncü esnâfından es-Seyyid Osman Ağa b. es-Seyyid Osman ve Rumeli Kalemi muhzırânından Canikli Ali Ağa b. Ali ve sâir cerîdede mazbûtü’l-esâmî Müslimîn ile hân-ı merkūm Odabaşısı Aci Zakar v. Markar zimmî hâzır oldukları hâlde kuflünü feth ü küşâd ve derûnunda bulunan gāib-i merkūmun eşyâsını tahrîr ve gāib-i mezbûrun li-ebeveyn hemşîresi olup emîne ve mu‘temede idiği bi’l-ihbâr zâhire olup gāib-i mezbûrun hâli mütebeyyin oluncaya değin kıbel-i şer‘den bi’l-kabûl kayyıme nasb u ta‘yîn olup zâtı mu‘arrefe olan kazasker-i merhûm-ı müşârün-ileyh hazretleri mu‘takalarından Hafize Kadın bt. Abdullah yedine li-ecli’l-hıfz îdâ‘ ve teslîm olunan eşyâ ve evânî-i nühâsiyenin defter-i müfredâtıdır ki ber-vech-i âtî zikr olunur. Fi’l-yevmi’s-sâdis min-Zilka‘deti’ş-şerîfe li-sene sitte ve erba‘în ve mi’eteyn ve elf. Yün memlû minder 2 aded Basma duvar yasdığı 5 aded Pembe memlû minder şiltesi 1 aded Çit döşek ma‘a çârşeb 1 aded Çit döşek şiltesi 2 aded Basma baş yasdığı 1 aded Kıbrıs basması yorgan ma‘a çârşeb 4 aded Mısır çârşebi 1 aded Döşek sargısı 1 aded Müsta‘mel şilte yüzü 1 aded Basma yasdık yüzü 2 aded Beyazlı ve siyahlı ve sarılı ve kırmızılı baş yemenîsi 7 aded İşlemeli makrame 6 aded Tüllü ve işlemeli havlu 3 aded Tüllü ve ipekli uçkur 3 aded Kilim 1 aded Bir mikdâr sarık ve bez parçaları Gezi parçası 1 aded Basma bohça 1 aded Sagīr ve kebîr reçel tabağı 14 aded Saksonya hoşâb kâsesi 2 aded Billûr kâse ma‘a kapak 4 aded Saksonya bardak 1 aded Billûr tabak 2 aded Venedik kâse 6 aded Sagīr ve kebîr salata tabağı 4 aded Billûr bardak ma‘a kapak 1 aded Ma‘den hoşâb kâsesi 1 aded Saksonya tuzluk ma‘a kapak 1 aded Saksonya çiçek 4 aded Venedik-kârî çiçek 1 aded Venedik-kârî reçel kavanozu 1 aded Su tası 1 aded Tepesi mercanlı ceviz hoşâb kaşığı 10 aded Ta‘âm kaşığı 3 aded Öd ağacı 2 parça Levha 2 aded Kahve fincanı 8 aded Tombak zarf 7 aded Nühâs kahve tebsisi 2 aded Kahve kutusu 1 aded Sagīr ve kebîr kahve güğümü 3 aded Kiraz 3, Sargılı 2, Yasemin duhân çubuğu 1 Kehribâ çubuk takımı 3 aded Pirinç duhân tablası 8 aded Pirinç nargile seri 1 aded Köhne marpuç 2 aded Pirinç taktuka 1 aded Sagīr ve kebîr tencere ma‘a kapak 6 aded Kebîr tâbe 2 aded Yumurta tâbesi ma‘a kapak 2 aded Sahan ma‘a kapak 7 aded Şorba tası ma‘a kapak 2 aded Kebîr lenger ma‘a kapak 1 aded Meydan sinisi 1 aded Kadayıf tebsisi 2 aded Sagīr ve kebîr polat tebsi 3 aded Leğen 2 aded İbrik 3 aded Kebîr câmeşûy leğeni 1 aded Su güğümü 2 aded Satıl 1 aded Hamam tası 1 aded Nühâs mangal ma‘a tâbe ma‘a kapak 1 aded Sagīr ve kebîr şamdan 2 aded Mum mikrâsı 1 aded Bir mikdâr şem‘-i asel Bağ mumu 0,5 kıyye Misk sabunu 4 aded Girid sabunu 23 kalıp Kavanoz derûnunda pirinç 5 kıyye Sagīr ve kebîr zeyt yağı şişesi 4 aded Keser 1 aded Barut kapağı 2 aded Kavanoz 4 aded Su destisi 1 aded Anbar 1 aded Sepet ve servi sandık 2 aded Dolap 1 aded İskemle 1 aded Fare kapanı 1 aded Sineklik 1 aded Cirit 3 aded Bâlâda muharrer eşyâ ve evânî-i nühâsiye-i mezkûre kayyıme-i mezbûre Hafize Kadın yedine li-ecli’l-hıfz îdâ‘ ve teslîm olunduğu işbu mahalle şerh verildi. es-Seyyid Abdurrahim el-kādı bi-Dârü’l-hilâfeti’l-aliyye bi-ma‘rifeti’l-fakīr ileyhi azze şânühû.