İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 145 Hüküm no: 111 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karakaş Avadik’in uhdesindeki gedik hisselerini Nartoy’ya sattığı Tütüncü mübâya‘ası Mahmiye-i İstanbul’da Langa Yenikapısı dâhilinde Kâtib Kasım mahallesinde mütemekkin tütüncü esnâfından Karakaş Avadik v. Arakil nâm zimmî tarafından husûs-ı âti’l-beyânı ikrâr ve i‘tâ-i hüccete vekîl olduğu Yiğitbaşı Hafız Ahmed Ağa b. Halil nâm kimesne ile Karabet v. Artin zimmî şehâdetleriyle ber-nehc-i şer‘î sâbit olan mahalle-i mezbûre Kâhyası Bağdisar v. Kigork zimmî meclis-i şer‘-i hatîr-i lâzımü’t-tevkīrde müvekkil-i mersûmun zevcesi olup işbu bâ‘isetü’s-sifr mu‘arrefetü’ş-şahs Nartoy bt. Kirkor nâm Nasrâniye muvâcehesinde bi’l-vekâle ikrâr-ı tâm ve takrîr-i kelâm edip müvekkilim mersûm Avadik zimmî mahmiye-i mezbûrede Süleymaniye Câmi‘-i şerîfi kurbünde Düğmeciler sûkunda vâki‘ bakkāl dükkânı ittisâlinde kâin Ma‘den Kalemi’nde kendi ismime mukayyed ve mu‘teber iki kepenk bir bâb tütüncü dükkânı ve ona merbût karşısında berber dükkânı ittisâlinde vâki‘ şehriye iki guruş kirâ-i kadîmeli iki kepenk bir bâb mağaza derûnlarında mevcûde beyne’l-esnâf gedik ta‘bîr olunur müstakıllen yedimde emvâlim olan bir peşkûn ve iki terâzî ma‘a derâhim ve altı billûr kâse ve dört teneke hûni ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile zevcem mersûme Nartoy Nasrâniyeye bin guruşa bey‘ ü temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz ve kabûl eyledikden sonra semeni olan meblağ-ı mezkûr bin guruşu bana def‘ ü teslîm ve ben dahi yedinden tamâmen ve kâmilen ahz u kabz etmemle mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-vech-i muharrer âharın ibrâsını kabûl eyledik ba‘de’l-yevm mârru’z-zikr dükkân ve ona merbût mağaza derûnlarında mevcûde gedik ta‘bîr olunan âlât-ı lâzıme-i muharrere-i mezkûre zevcem mersûme Nartoy Nasrâniyenin emvâl-i müşterâtı ve hakk-ı sırfı olup benim aslâ alâka ve medhalim kalmamışdır dedi dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 7 Z sene 1246 Şuhûdü’l-hâl: Kethüdâ Kâşif Mustafa Ağa, Kethüdâ vekîli es-Seyyid Mehmed Ağa, Kâtib Mehmed Efendi, Yiğitbaşı Hafız Ahmed Ağa, İmâmzâde Ahmed Ağa.