İstanbul Mahkemesi 156 Numaralı Sicil (H. 1246-1247 / M. 1831-1832) cilt: 92, sayfa: 144 Hüküm no: 110 Orijinal metin no: [21b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Sarafim’in uhdesindeki gedik hisselerini Marta ile kocasına sattığı Bakkāl mübâya‘ası Âsitâne-i aliyye’de vâki‘ bakkāl tâifesinden Sarafim v. Yorgi nâm zimmî meclis-i şer‘-i hatîrde işbu bâ‘iseyü’s-sifr Marta bt. Praşkova nâm Nasrâniye ile Bakkāl Lazari v. Todori nâm zimmî taraflarından husûs-ı âtîde tasdîka vekîl-i şer‘îleri mersûme Marta Nasrâniyenin zevci Bakkāl Yovakim v. Simyon nâm zimmî muvâcehesinde ikrâr-ı tâm ve takrîr-i kelâm edip mahmiye-i mezbûrede Hocapaşa mahallesinde câmi‘-i şerîf karşısında su hazînesi ittisâlinde kâin Ömer Ağa dükkânı denmekle şehîr bir bâb ve yine mahalle-i mezbûrede leblebici ve İmâm İbrahim Efendi dükkânları beyninde kâin el-Hâc Yusuf dükkânı denmekle arîf bir bâb ki [cem‘an] iki bâb bakkāl dükkânları derûnlarında mevcûde beyne’l-esnâf gedik ta‘bîr olunur âlât-ı lâzıme-i ma‘lûmelerin yüz yirmişer sehm i‘tibârıyla yirmişer sehmi vekîl-i mersûm Yovakim zimmînin sek[se]ner sehmi âharın ve yirmişer sehmi akd-i âti’z-zikrin sudûruna değin bâ-hüccet-i şer‘iye benim yedimizde mülkümüz olmağla ben zikr olunan dükkânların her birinden ber-minvâl-i muharrer mâlik olduğum yirmişer sehm hissemi tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkilân-ı mersûmân Marta Nasrâniye ve Lazari zimmîye bâ-izn-i şürekâ iki bin yedi yüz guruşa ale’l-iştirâk bey‘ ü temlîk ve vech-i lâyıkı üzere teslîm eylediğimde onlar dahi ber-vech-i meşrûh iştirâken iştirâ ve temellük ve tesellüm ve kabz ve kabûl eylediklerinden sonra semen-i mezkûr iki bin yedi yüz guruşu müşteriyân-ı müvekkilân-ı mersûmân yedlerinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini bi’l-asâle ve bi’l-vekâle ibrâ-i âm ile kabûlü hâvî ibrâ ve iskāt eyledik fî-mâ ba‘d zikr olunan gediklerin hisse-i mezkûrelerinde benim aslâ ve kat‘â alâka ve medhalim kalmamışdır dedikde gıbbe[‘t-tasdîki’ş-şer‘î mâ vaka‘a bi’t-taleb ketb olundu] Fî 4 Z sene 1246 Şuhûdü’l-hâl: Pazarbaşı Süleyman Ağa, Yiğitbaşı Abdi Ağa, Hafız İsmail Ağa b. Mustafa. Kabzımâl Sava, Yazıcı Dimitri, Ustabaşı İsak v. Kiryako.