Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 414 Hüküm no: 486 Orijinal metin no: [78(2)a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kefil Şahin v. Bogos’un Allahverdi v. Begos’a olan borcu ödemesi gerektiği Mahmiye-i İstanbul’da Kebeciler hanında sâkin tüccâr tâifesinden işbu bâ‘isü’l-vesîka Allahverdi v. Begos nâm zimmî meclis-i şer‘-i şerîf-i enverde ve mahfil-i münîf-i ezherde mahmiye-i mezbûrda Kasım Kâtib mahallesinde sâkin Şâhin v. Bogos nâm zimmî muvâcehesinde üzerine da‘vâ takrîr-i kelâm edip târih-i kitâbdan bir sene mukaddem mezbûr Şâhin’in li üm er karındaşı gāib ani’l-meclis Kestostor v. Toros nâm zimmî zimmetinde yedimden müşterâ ve makbûz aded ve kıymeti beynimizde ilm-i şer‘îyle ma‘lûm sincan asdarı bahâsından ba‘de külli’l-hesâb seksen yedi buçuk guruş hakkım olmağın meblağ-ı mezbûre merkūm Şâhin tarafından emr ve kabûlü hâviye kefâlet-i sahîha-i şer‘iyye ile kefîl olmağla kefâletine binâen meblağ-ı mezbûru mezbûr Şâhin’den taleb ederim suâl olunup alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrede merhûm Hüseyin Efendi hanında sâkin Abraham v. Avadik ve Hato v. Emur? nâm zimmîler li ecli’ş-şehâde meclis-i şer‘a hâzırân olup istişhâd olunduklarında [78(2)b] fi’l-hakīka müdde‘î-i mezbûr Allahverdi v. Bogos’un gāib-i mezbûr Kestostor v. Toros nâm zimmî zimmetinde ber vech-i muharrer yedinden müşterâ ve makbûz aded ve kıymeti beynlerinde ma‘lûm sincan asdarı bahâsından seksen yedi buçuk guruş hakkımı târih-i mezbûrda mezbûr Şâhin bizim huzûrumuzda tarafeynden emr ve kabûlü hâviye kefâlet-i sahîha-i şer‘iyye ile kefîl, ol dahi bizi işhâd eyledi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdeti şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm kefâlete binâen meblağ-ı mezbûru müdde‘î-i mezbûra edâ ve teslîme mezbûr Şâhin’e tenbîh birle mâ hüve’l-vâki‘ bi’t-taleb ketb [olundu]. Fi’l-yevmi’r-râbi‘ aşer min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. Yusuf, Mehmed b. İdris, Mahmud b. Mehmed.