Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 413 Hüküm no: 485 Orijinal metin no: [78(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ömer’in vârislerinin Mehmed Efendi b. Mehmed Vakfı’na olan borcu ödemeleri gerektiği Mahmiye-i İstanbul’da es-Seyyid Ömer mahallesinde sâkin iken bundan akdem fevt olan Fâtıma bt. Ömer’in verâseti li ebeveyn er karındaşı oğulları İbrahim Halîfe ve Afîfe b. Mahmud’a münhasıra olduğu şer‘an zâhir ve müte‘ayyin oldukdan sonra ashâb-ı hayrâtdan Hüseyin Beşe nâm sâhibü’l-hayrın nukūd-ı mevkūfesine bi’l-fi‘l mütevellî olan işbu bâ‘isü hâze’l-kitâb Mehmed Efendi b. Mehmed meclis-i şer‘-i şerîf-i enverde tereke-i müteveffâ-yı mezbûreye bi’l-verâse vâzı‘ü’l-yed olan mezbûr İbrahim Çelebi muvâcehesinde üzerine da‘vâ ve takrîr-i kelâm edip mezbûre Fâtıma târih-i kitâbdan üç sene mukaddem mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilini, bi cümleti’t-tevâbi‘ bana kırk beş esedî guruşa bi tarîki’l-istiğlâl bey‘ ve teslîm ben dahi iştirâ ve tesellüm ve teslîm-i semen-i mezbûr eylediğimden yine menzil-i mezbûru ba‘de’t-tahliyye ve’t-tekābuz târih-i mezkûrdan bir sene tamâmına değin kendiye elli esedî guruşa îcâr ve teslîm ol dahi istîcâr ve kabûl ve kabz ettiğinden sonra sene tamâmından sonra edâ-i deyn ve fekk-i rehin etmeksizin mezbûre Fâtıma fevt olup terekesine mezbûr İbrahim Çelebi bi’l-verâse vâzı‘ü’l-yed olmağın hâlâ kendiden suâl olunup asl-ı mâl-ı mezbûr ile ücret-i mezkûre elli guruş ki cem‘an elli bir esedî guruşun tereke-i müteveffâ-yı mezbûreden bana edâya mezbûr İbrahim Çelebi’ye tenbîh olunması matlûbumdur deyû bir kıt‘a istiğlâl hücceti ibrâz edip mezbûr İbrahim Çelebi muvâcehesinde feth ve kırâat olundukda mazmûnu min külli’l-vücûh takrîr-i meşrûhuna mutâbık bulunmağın gıbbe’s-suâl mezbûr İbrahim Çelebi mazmûn-ı hüccet-i mezbûreyi ve tereke-i müteveffâ-yı mezkûreyi bi’l-verâse vaz‘-ı yedini tav‘an ikrâr ve i‘tirâf etmeğin mûcebiyle tereke-i müteveffâ-yı mezkûreden asl-ı mâl-ı mezbûr ile ücret-i mezbûreden bir senede müctemi‘ olan elli guruş ki cem‘an elli bir esedî guruşu mütevellî-i mezkûr mezbûra edâ ve teslîme mezbûr İbrahim Çelebi’ye tenbîh olunup mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Osman Ağa b. Mustafa, Murtaza b. Mahmud, Mehmed Halîfe b. Süleyman, Receb Çelebi b. İbrahim.